ސްޓެލްކޯ އިން އަންހެން އިލެކްޓްރީޝަނުން ތަމްރީނު ކުރަނީ

އަންހެން އިލެކްޓްރިޝަނުން ތަމްރީނު ކުރުމުގެ ޕްރޮގްރާމެއްގައި ބައިވެރިވުމުގެ ފުރުސަތު ސްޓެލްކޯ އިން ހުޅުވާލައިފި އެވެ.

"ބިގިނާސް އިލެކްޓްރީޝަން ކޯސް ފޯ ވިމެން" ނަމުގައި ސްޓެލްކޯ އިން. ކުރިއަށް ގެންދިޔުމަށް ނިންމާފައިވާ މި ކޯހަކީ އިލެކްޓްރިކަލް ދާއިރާއަށް އަންހެނުން ޝައުގުވެރިކުރުވައި އެ ދާއިރާގައި ފިރިހެނުންނާ އެއް ހަމައެއްގައި މަސައްކަތް ކުރުމުގެ ފުރުސަތު ފަހިކޮށް ދިނުމަށްޓަކައި ކުރިއަށް ގެންދާ ކޯހެއް ކަމަށް ސްޓެލްކޯ އިން ބުނެއެވެ.

މި ކޯހުގައި ހިލޭ ބައިވެރިވުމުގެ ފުރުސަތު މިހާރު ހުޅުވާލެވިފައިވާކަމަށް ސްޓެލްކޯ އިން ބުނެއެވެ. މި ކޯހުގައި ރައްކާތެރިގޮތުގައި ކަރަންޓު ބޭނުން ކުރުމާއި، ކަރަންޓަށް ކުރާ ޚަރަދު ކުޑަ ކުރުމުގެ އިތުރުން، ކަރަންޓު ވަޔަރ ކުރުމުގެ އަސާސީ މަޢުލޫމާތު ކިޔަވައިދިނުމަށް ހަމަޖެހިފައިވާ ކަމަށްވެސް އެކުންފުނިން ބުނެފައިވެއެވެ.

ހަތަރު ދުވަހުގެ މުއްދަތަށް މާލޭގައި ކުރިއަށް ގެންދިޔުމަށް ނިންމާފައިވާ މި ކޯހުގައި ބައިވެރިވެވޭނީ 16 އަހަރުން މަތީގެ މީހުންނަށެވެ. ކޯހުގައި ބައިވެރިވުމަށް އަންނަ މަހުގެ 4 އާ ހަމައަށް ވަނީ ހުޅުވާލެވިފައެވެ.