ތުރުކީގެ ވެރިރަށުގައި ދިން ނިރުބަވެރި ހަމަލާގައި މަރުވި މީހުންގެ އަދަދު 5 އަށް!

ތުރުކީގެ ވެރިރަށް އަންކާރާ ކައިރީގައި ހުންނަ ތުރުކީގެ އެރޯސްޕޭސް އެންޑް ޑިފެންސް ކުންފުނި ތުރުކީ އެރޯސްޕޭސް އިންޑަސްޓްރީޒް (ޓޫސަސް) ގެ ހެޑްކުއާޓަރަށް ދިން ހަމަލާއެއްގައި ފަސް މީހުން މަރުވެ 22 މީހުން ޒަހަމްވެފައިވާ ކަމަށް ތުރުކީގެ ރައީސް ވިދާޅުވެއްޖެ އެވެ.

ބުދަ ދުވަހު ހަވީރު މި ހަމަލާ ދިން އިރު ރަޝިއާގައި ލަޑިމިއާ ޕޫޓިންއާ އެކު މަޝްވަރާ ކުރައްވަމުން ގެންދެވި ރައީސް ރަޖަބް ތައްޔިބު އުރުދުޣާން ވަނީ މަރުވި މީހުންގެ އަދަދު ކަށަވަރުކޮށްދެއްވައި، އެއީ "ނުރައްކާތެރި ޓެރަރިސްޓް ހަމަލާއެއް" ކަމަށް ވިދާޅުވެ އެކަން ކުށްވެރި ކުރައްވައިފަ އެވެ.

ތުރުކީގެ ދާޚިލީ ވަޒީރު އަލީ ޔަރްލިކާޔާ އެކްސްގައި ލިޔުއްވާފައިވާ ގޮތުގައި ދައުލަތުގެ ކުންފުނީގެ ހެޑްކުއާޓަރުގައި ދިން މި ހަމަލާގެ ފަހަތުގައި ތިބި ދެ ނިރުބަވެރިން ވަނީ މިހާރު މަރާލާފައި އެވެ. އަދި އެއީ އަންހެނަކާއި ފިރިހެނެއް ކަމަށް އޭނާ ވިދާޅުވި ނަމަވެސް އެމީހުންގެ ވަނަވަރު ހާމައެއް ނުކުރެއެވެ.

އަންކާރާގެ އުތުރުން ގާތްގަނޑަކަށް 40 ކިލޯމީޓަރު (25 މޭލު) ދުރުގައި އޮންނަ ކުޑަ އަވަށެއް ކަމަށްވާ ކަހްރާމަންކަޒާންގައި ހިނގި މި ހަމަލާއަށް ފަހު އެގައުމުގެ މީޑިއާތަކުން ބްރޯޑްކާސްޓްކުރި މަންޒަރުތަކުން ފެންނަ ގޮތުގައި އެތަނުގައި ވަރުގަދަ ގޮވުމެއް ގޮވައި އަލިފާން ރޯވެފައި ވެއެވެ. އަދި އޭގެ ފަހުން ބަޑީގެ ހަމަލާތަކެއް ވެސް ދީފައިވާ ކަމަށް އެ ގައުމުގެ ނޫސްތަކުން ބުނެ އެވެ.

ބްރޯޑްކާސްޓަރުން ގެނެސްދިން މި ހަމަލާގެ ސެކިއުރިޓީ ކެމެރާ ފޮޓޯތަކުން ފެންނަގޮތުގައި ހަނގުރާވެރި ހެދުންއަޅައިގެން ހުރި މީހަކު ބެކްޕެކެއް ހިފައިގެން އެސޯލްޓް ރައިފަލެއް ހިފައިގެން ވަތް މަންޒަރު ފެނެއެވެ. އަދި އެހެން ފޮޓޯތަކުން ފެންނަނީ އަންހެނަކު ހަތިޔާރު ހިފައިގެން އުޅޭ މަންޒަރެވެ.

މި ހަމަލާގެ ޒިންމާ އަދި އުފުލާފައި ނުވި ނަމަވެސް ޖަސްޓިސް މިނިސްޓަރު ވިދާޅުވީ އެ މައްސަލަ ތަހުގީގު ކުރަން ފަށާފައިވާ ކަމަށެވެ ކަމަށެވެ. އެގައުމުގެ ރިޕޯޓުތައް ބުނާގޮތުގައި މި ހަމަލާގެ ފަހަތުގައި ތިބި ކަމަށް މިހާތަނަށް ބެލެވެނީ ސަރުކާރާ ދެކޮޅަށް އެތައް އަހަރެއް ވަންދެން ހަރުކަށި ފިކުރު ހިންގަމުން އަންނަ، މަނާކޮށްފައިވާ ކުރުދިސްތާން ވޯކާސް ޕާޓީ (ޕީކޭކޭ) އެވެ.