އިސްލާމީ މަރުކަޒުގެ މަސްފެންގަނޑު މަރާމާތުކުރުމުގެ މަސައްކަތް ސްޓެލްކޯގެ ސީއެސްއާރްގެ ދަށުން ފަށައިފި

އިސްލާމީ މަރުކަޒުގެ މަސްފެންގަނޑު މަރާމާތުކުރުމުގެ އަމަލީ މަސައްކަތް ސްޓެލްކޯއިން ފަށައިފި އެވެ.

އިސްލާމީ މަރުކަޒަށް 40 އަހަރު ފުރޭތީ މަސްފެންގަނޑެއް ހަދަން އިސްލާމިކް މިނިސްޓްރީން ދާދިފަހުން އިއުލާނެއް ކުރި ނަމަވެސް ފަހުން އެ އިއުލާނު ވަނީ ބާތިލުކޮށްފައެވެ. އިސްލާމީ ކަންތައްތަކާއި ބެހޭ ވުޒާރާއިން ބުނީ އެ އިއުލާނު ބާތިލުކުރަން ނިންމީ ރާއްޖޭގެ މާލީ ހާލަތާއި ގުޅިގެން އެފަދަ މަސައްކަތެއް ބަޔަކާއި ހަވާލުކޮށްގެން ކުރިޔަށް ގެންދިޔުން މިވަގުތު މުނާސަބު ނުވުމާއި އެކުގައި ކަމަށެވެ.

ނަމަވެސް މި މިމަސައްކަތް ސްޓެލްކޯގެ ސީއެސްއާރްގެ ދަށުން ކުރިޔަށް ގެންދިޔުމަށް ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީ ވަނީ މިދިޔަ ހަފްތާގައި ޝައުގުވެރިކަން ފާޅުކޮށްފައެވެ. މިދިޔަ ހަފްތާގައި އިސްލާމީ ކަންތައްތަކާއި ބެހޭ ވަޒީރު ޑރ ޝަހީމް އަލީ ސައީދުއާއި ބައްދަލުކުރެއްވުމަށްފަހު ފަހުމީ އޭރު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ސަގާފީ އަދި ދީނީ ތަންތަން ހިމާޔަތްކުރުމަށް އެހީތެރިވުމުގެ ފުރުސަތުތައް ހޯދުމަކީ އެ ކުންފުންޏަށް ލިބޭ ޝަރަފެއް ކަމަށާއި އިސްލާމީ މަރުކަޒުގެ މުންނާރުގެ ތިރީގައި ވާ ފެންގަނޑަކީ ތާރީހީ މުހިންމު ތަނެއް ކަމުން އެ ތަނަކީ ވަރަށް ހިތްގައިމު ތަނެއްގެ ގޮތުގައި ތަރައްޤީކުރުމަށް ސްޓެލްކޯއިން ޝައުގުވެރިވާ ކަމަށެވެ.

މަސައްކަތުގެ އަމަލީ މަސައްކަތް ފެށުނުކަމުގެ ފޮޓޯއަކާއި އެކު މިއަދު ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ އިސްލާމީ މަރުކަޒުގެ މުންނާރުގެ ދަށުގައި ހުރި މަސްފެންގަނޑު މަރާމާތު ކުރުމުގެ މަސައްކަތް ސްޓެލްކީއިން ރަސްމީކޮށް ފަށާފައިވާ ކަމަށެވެ. އަދި ސްޓެލްކޯގެ އަމާޒަކީ، މުޖުތަމަޢަށް ތާރީޚީ އަދި ޘަޤާފީ މުހިންމު އެތަން ޙިމާޔަތްކޮށް، ކުރިއެކޭ އެއްގޮތަށް އެތަނަށް ދިރުން ގެނައުމަށް ކަމަށް ފަހުމީ ވިދާޅުވި އެވެ.

އިސްލާމި މަރުކަޒަށް 40 އަހަރު ފުރޭނީ އަންނަ މަހުގެ 11 ވަނަ ދުވަހު އެވެ. އިސްލާމީ މަރުކަޒު ރަސްމީކޮށް ހުޅުވީ 1984 ވަނަ އަހަރުއެވެ.