މައިކްރޯސޮފްޓް އިން އަމަލީ ތަޖުރިބާ ހިމެނޭ ތަމްރީން ޕްރޮގްރާމެއް ރާއްޖޭގައި ހިންގައިފި

މައިކްރޯސޮފްޓް އިން އަމަލީ ތަޖުރިބާ ހިމެނޭ ތަމްރީން ޕްރޮގްރާމެއް ހިންގައިފިއެވެ.

މި ތަމްރީނު ޕްރޮގްރާމު ހިންގީ މި އަހަރުގެ ސައިބަރ ސެކިއުރިޓީ ހޭލުންތެރިކަމުގެ މަހުގެ ބައެއްގެ ގޮތުގައި ބޭއްވި ޤައުމީ އާޓިފިޝަލް އިންޓެލިޖެންސް އަދި ސައިބަރ ސެކިއުރިޓީ ހޭލުންތެރިކަމުގެ ސިމްޕޯޒިއަމްގެ 3ވަނަ ދުވަހުއެވެ.

މި ޕްރޮގްރާމުގައި ސަރުކާރުގެ އިދާރާތަކާއި، ކުދި އަދި މެދު ފަންތީގެ ވިޔަފާރިތަކާއި، ދައުލަތުގެ ވިޔަފާރި ކުންފުނިތަކުގެ އައިޓީ އެޑްމިނިސްޓްރޭޓަރުންނާއި، ސެކިއުރިޓީ ޕްރޮފެޝަނަލުންނާއި، ސިސްޓަމް އިންޖިނިއަރުން ވަނީ ބައިވެރިވެފައެވެ.

މި ޕްރޮގްރާމް ކުރިއަށް ގެންދެވީ މައިކްރޯސޮފްޓްގެ ސޮލިއުޝަން އޭރިއާ ސްޕެޝަލިސްޓް، އަޒްމީ ސަލީއެވެ.

މި ޕްރޮގްރާމްގެ ބައިވެރިން ވަނީ މައިކްރޯސޮފްޓް 365ގެ ޚިދުމަތްތަކާއި، މިހާރުގެ ސިސްޓަމްތަކުގައި ނެޓްވޯކް ސެކިއުރިޓީ ޓޫލްތައް ޓެސްޓްކޮށްފައެވެ. މީގެ އަމާޒަކީ ސައިބަރ ސެކިއުރިޓީ ފިޔަވަޅުތަކުގެ ޢަމަލީ ބޭނުންތަކަށް އަހައްމިއްޔަތުކަން ދިނުމެވެ.

މީގެ ތެރޭގައި ހިމެނެނީ:

1. އައިޑެންޓިޓީ އަދި އެކްސެސް މެނޭޖްމަންޓް
2. މައިކްރޯސޮފްޓް ޑިފެންޑަރއާއެކު ނުރައްކާތަކުން ރައްކާތެރިވުން
3. ކްލައުޑް ބޭސްޑް އިންފްރާސްޓްރަކްޗަރ އަދި ވޯކްލޯޑްސް ރައްކާތެރިކުރުން
4. ސެކިއުރިޓީ ޕޮލިސީތަކާއި އޮޓޮމޭޝަން ޓޫލްތަކުގެ ލައިވް ޑެމޮންސްޓްރޭޝަންތައް

އެން.ސީ.އައި.ޓީ އޯޑިޓޯރިއަމްގައި ބޭއްވި މި ޕްރޮގްރާމުން އެކި ދާއިރާތަކުގެ ޕްރޮފެޝަނަލުންނަށް އެމީހުންގެ ސައިބަރ ސެކިއުރިޓީގެ ޢިލްމު އިތުރުކޮށް، އެމީހުންގެ ދުވަހުން ދުވަހަށް ކުރާ މަސައްކަތުގައި އެ ޢިލްމު ބޭނުންކުރުމަށް އެއްބާރުލުން ދޭ މާޙައުލެއް ގާއިމްކޮށްދީފައިވެއެވެ.

މި ޕްރޮގްރާމުން ލިބުނު ހުނަރުތަކާއި އިރުޝާދުތަކުގެ ސަބަބުން ބައިވެރިންނަށް މިހާރު ކުރިމަތިވެފައިވާ ސައިބަރ ސެކިއުރިޓީގެ ނުރައްކާތަކުން ދިފާޢުވުމުގެ ޤާބިލުކަން އިތުރުވުމުގެ އިތުރުން، ރާއްޖޭގައި އިތުރަށް ރައްކާތެރި އަދި ދެމެހެއްޓެނިވި ޑިޖިޓަލް މާޙައުލެއް ބިނާކުރުމަށް މަގު ފަހިވެގެންދާނެއެވެ.

މުއައްސަސާތަކުން ކްލައުޑް ޓެކްނޮލޮޖީތަކާއި ޒަމާނީ އޭ.އައި ޙައްލުތައް ބޭނުންކުރަމުންދާއިރު، މިފަދަ ޙަރަކާތްތަކަކީ ސެކިއުރިޓީ ޕްރޮފެޝަނަލުން ސައިބަރ ނުރައްކާތަކުގެ ކުރިއަށް ތިބުމަށާއި، ސައިބަރ ސެކިއުރިޓީގެ ދެމެހެއްޓެނިވި މުސްތަޤްބަލެއް ކަށަވަރުކުރުމަށް ކޮންމެހެން މުހިންމު ކަންކަމެވެ.