ކެންދޫގައި ޤާއިމްކުރާ އައު އިންޖީނުގޭގެ މަސައްކަތުގެ ބޮޑު ބައެއް ނިމިއްޖެ

ބ. ކެންދޫގައި ޤާއިމް ކުރަމުންދާ އައު އިންޖީނުގެ އާއި ފެނަކަ އޮފީސް އިމާރާތުގެ މަސައްކަތް ވަރަށް ބާރަށް ކުރިއަށްދާ ކަމަށް ފެނަކަ ކޯޕަރޭޝަނުން ހާމަކޮށްފި އެވެ.

އެރަށުގައި ދެމުންދާ ކަރަންޓުގެ ޚިދުމަތް ފުޅާ ކުރުމަށާއި ފެނަކައިން ދެމުންދާ ޚިދުމަތްތަކުގެ ފެންވަރު ރަނގަޅު ކުރުމުގެ މަޤްސަދުގައި ކުރިއަށް ދާ މި މަޝްރޫޢުގެ އެންމެ ފަހުގެ އަދާހަމަ މައުލޫމާތު މިއަދު މީޑިއާތަކާއި ހިއްސާކުރަމުން އެކުންފުނިން ބުނީ މަސައްކަތުގެ %75 މިހާރު ވަނީ ނިމިފައި ކަމަށެވެ.

އެގޮތުން، އޮފީސް އިމާރާތުގެ ދޮރުތައް ހަރުކުރުމުގެ މަސައްކަތް މިހާރު ކުރިއަށް ދާއިރު، ސީލިންގގެ މަސައްކަތް ވަނީ އެއްކޮށް ނިމިފައި ކަމަށާއި އައު އިންޖީނުގޭގައި މިހާރު ކުރިއަށް ދަނީ މައި ތާނގީ ބެހެއްޓުމުގެ މަސައްކަތް ކަމަށް ފެނަކައިން ބުނެއެވެ.

މި އަހަރުގެ ނޮވެމްބަރ މަހުގެ ނިޔަލަށް އެއްކޮށް ނިންމާލުމަށް އަމާޒު ކޮށްފައިވާ މި މަޝްރޫޢު ނިމުމުން، މިހާރު ދެމުންދާ ޚިދުމަތްތަކުގެ ފެންވަރު ރަނގަޅު ކުރެވި، އެރަށުގެ އާއްމު ރައްޔިތުންގެ އިތުރުން ވިޔަފާރިތަކަށްވެސް އޭގެ ނަފާ ލިބިގެންދާނެ ކަމަށް ފެނަކައިން ހާމަކުރެއެވެ.