ކަރަންޓުގެ ޚިދުމަތް ފުޅާކުރުމަށް ފާއިތުވި އެއް އަހަރު ދުވަހުގެ ތެރޭގައި ގިނަ މަސައްކަތްތަކެއް ކުރެވުނު – ފެނަކަ

ފާއިތުވި އަހަރެއްހާ ދުވަހަކީ، ކަރަންޓުގެ ޚިދުމަތް ފުޅާކުރުމަށާއި ތަރައްޤީ ކުރުމަށް ގިނަ މަސައްކަތްތަކެއް ކުރެވުނު އަހަރެއްކަމަށް ފެނަކައިން ހާމަކޮށްފިއެވެ.

ރައީސް ޑރ މުހައްމަދު މުއިއްޒުގެ ވެރިކަމަށް މިއަދު އަހަރެއް ފުރިގެން ދިޔުމާއި ގުޅިގެން ފެނަކައިން މިއަދު ވަނީ ރާއްޖޭގައި ކަރަންޓު ކެޕޭސިޓީ އިތުރު ކުރުމަށް ކުރެވުނު މަސައްކަތްތަކާއި، ކަރަންޓު ނެޓްވޯކް އަޕްގްރޭޑް ކުރުމަށް ކުރެވުނު މަސައްކަތްތަކުގެ ތަފްސީލް ހާމަކޮށްފައެވެ.

އެގޮތުން އެ ކުންފުނިން ކަރަންޓުގެ ޚިދުމަތްދޭ ރަށްތަކުގެ ތެރެއިން 56 ރަށަކަށް ޖުމްލަ 61 ޖެންސެޓް، ފާއިތުވި އަހަރެއްހާ ދުވަހުގެ ތެރޭގައި ފޯރުކޮށްދީފައިވެއެވެ. މިއީ މެގަވޯޓުން ބަލާނަމަ ޖުމްލަ 36.7 މެގަވޯޓުގެ ކުރިއެރުމެކެވެ. އައު ޖެންސެޓްތައް ހޯދުމުގެ އިތުރަށް، މިހާރު ބޭނުން ކުރަމުންދާ ގިނަ ޖެންސެޓްތަކެއް އޯވަރހޯލް ކުރުމުގެ މަސައްކަތްވެސް ކުރިއަށް ގެންގޮސްފައިވެއެވެ. މީގެ އިތުރުން ކަރަންޓް ނެޓްވޯކް އަޕްގްރޭޑް ކުރުމަށްވެސް ގިނަ މަސައްކަތްތަކެއް އެ ކުންފުނިން ވަނީ ކޮށްފައެވެ. އޭގެތެރޭގައި، އައު ޓްރާންސްފޯމަރުތައް އިންސްޓޯލްކުރުމާއި، މިހާރު ހުރި ޓްރާންސްފޯމަރުތައް އަޕްގްރޭޑް ކުރުން ހިމެނެއެވެ.

ރާއްޖޭގެ އެކި ރަށްރަށުގައި ޤާއިމްކުރެވެމުންދާ ހައުސިން ޔުނިޓްތަކަށް ކަރަންޓު ގުޅައިދިނުމުގެ މަސައްކަތްވެސް ފާއިތުވެމިދާ އަހަރު ފެނަކައިން ވަނީ ކޮށްފައެވެ. އެގޮތުން ބ.ތުޅާދޫ، ހދ.ނޮޅިވަރަންފަރާއި ތ.ތިމަރަފުށީގައި އަލަށް ޤާއިމްކޮށްފައިވާ 360 ހައުސިން ޔުނިޓްތަކަށް ކަރަންޓު ގުޅައިދިނުމުގެ މަސައްކަތް ކޮށްފައިވެއެވެ.

ކަރަންޓުގެ މައްސަލައަށް ދާއިމީ ޙައްލެއް ހޯދައިދިނުމުގެ ގޮތުން، އާބާދީ ބޮޑު ތިން ސިޓީކަމުގައިވާ، އައްޑޫ، ފުވައްމުލަކު އަދި ކުޅުދުއްފުށި ސިޓީގައި ސެންޓްރަލް ޕަވަރ ސްޓޭޝަންތަކެއް ޤާއިމްކުރުމަށް އެމްއޯޔޫތަކުގައި ސޮއިކޮށް އެ މަސައްކަތް ވަނީ ފަށާފައެވެ. މީގެތެރޭގައި ހިމެނެނީ އައްޑޫ ސިޓީގައި 32 މެގަވޯޓު އަދި ފުވައްމުލަކާއި ކުޅުދުއްފުށި ސިޓީގައި 20 މެގަވޯޓު ކެޕޭސިޓީގެ ޕަަވަރ ޕްލާންޓެއް ޤާއިމްކުރުމެވެ. މި ތިން ސިޓީގެ އިތުރުން ލ.ގަމުގައިވެސް 20 މެގަވޯޓު ކެޕެސިޓީގެ ޕަވަރ ޕްލާންޓެއް ޤާއިމްކުރުމަށް އެމްއޯޔުއެއްގައި ވަނީ ސޮއިކުރެވިފައެވެ. އޭގެތެރެއިން އައްޑޫ ސިޓީގައި ޤާއިމްކުރުމަށް ހަމަޖެހިފައިވާ ސީޕީއެސް ޤާއިމްކުރުމަށް ކޮންޓްރެކްޓަރަކާއި ޙަވާލުކޮށް، އެ ޕްރޮޖެކްޓްގެ އަމަލީ މަސައްކަތްތައް ވަނީ ފެށިފައެވެ.

ފެނަކައިން ދެމުންގެންދާ ކަރަންޓުގެ ޚިދުމަތުގެ ފެންވަރު ރަނގަޅު ކުރުމަށް ރަށްރަށުގައި ކުރިއަށްދާ ޕްރޮޖެޓްތަކުގެ ތެރެއިން އައު ތިން އޮފީސް އިމާރާތަކާއި ތިން ރަށެއްގައި ކުރިއަށް ދިޔަ ޑެގްރޫމް އެކްޓެންޝަން ޕްރޮޖެކްޓެއް ވަނީ މިއަހަރު ނިންމާލާފައެވެ.