މޫސުން ވަރަށް ގޯސް, މުޅި ރާއްޖެ ހުދު ސަމާލުގައި!

މޫސުން ގޯސްވާނެ ކަމަށް ލަފާކޮށް މޫސުމާއި ބެހޭ ގައުމި އިދާރައިން ރާއްޖޭގެ ހުރިހާ ސަރަހައްދުތަކަކަށް ހުދު ސަމާލު ނެރެފި އެވެ.

މޫސުމާއި ބެހޭ ގައުމި އިދާރާއިން ވަނީ ރާއްޖޭގެ ހުރިހާ ސަރަހައްދެއް ހިމެނޭހެން ދެ ހުދު ސަމާލެއް ނެރެފައި އެވެ.

އެގޮތުން ފުރަތަމަ ހުދު ސަމާލު ނެރެފައިވަނި ހއ އަތޮޅުން ފެށިގެން ލ އަތޮޅާއި ހަމައަށެވެ. މޫސުމާ ބެހޭ ގައުމީ އިދާރާއިން ބުނީ ހުދު ސަމާލުގެ މުއްދަތުގައި އެސަރަހައްދަށް ބޯކޮށް ވާރޭވެހުމާއި އެކު ގުގުރުމުގެ އިތުރުން ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށެވެ. އަދި ކަނޑުތައްވެސް ގަދަވާނެ ކަމަށް ވަނީ ލަފާކޮށްފައެވެ.

ދެވަނަ ހުދު ސަމާލު ނެރެފައިވަނީ ރާއްޖޭގެ އެންމެ ދުކުނުން ގއ އަތޮޅުން ފެށިގެން އައްޑޫ ސިޓީއާއި ހަމައަށެވެ. މި ސަމާލުގައި މޫސުމާއި ބެހޭ ގައުމީ އިދާރާއިން ބުނީ އެސަރަހައްދަށް ބޯކޮށް ވާރޭވެހި ގުގުރުމުގެ އިތުރުން ވިލާގަނޑުގައި 40 މޭލަށް ވައިގަދަވާނެ ކަމަށެވެ.

މި ދެ ސަމާލުވެސް ނެރެފައިވަނީ މިއަދުގެ 14:45 އިން ފެށިގެން މިރޭގެ 20:45 ގެ ނިޔަލަށެވެ.

މޫސުމާއި ބެހޭ ގައުމީ އިދާރާއިން ބުނާގޮތުގައި ހުޅަނގު މޫސުމުގެ ބާރު މިދުވަސްވަރު ވަނީ ގަދަވެފައި އެވެ. މިއާއި އެކު މި ހިނގާ ހަފްތާގައި ރާއްޖޭގެ އެކި ސަރަހައްދުތަކަށް މޫސުން ގޯސްވާނެ ކަމަށް މޫސުމާއި ބެހޭ ގައުމީ އިދާރާއިން ވަނީ ލަފާކޮށްފައެވެ.