އިސްލާމީ މަރުކަޒުގެ މަސްފެންގަނޑު މަރާމާތު ކޮށްދޭން ސްޓެލްކޯ ތައްޔާރު!

އިސްލާމީ މަރުކަޒުގެ މަސްފެންގަނޑު މަރާމާތުކޮށްދޭން ސްޓެލްކޯއިން ޝައުގުވެރިކަން ފާޅުކޮށްފި އެވެ.

އިސްލާމީ މަރުކަޒަށް 40 އަހަރު ފުރޭތީ މަސްފެންގަނޑެއް ހަދަން އިސްލާމިކް މިނިސްޓްރީން ދާދިފަހުން އިއުލާނެއް ކުރި ނަމަވެސް ފަހުން އެ އިއުލާނު ވަނީ ބާތިލުކޮށްފައެވެ. އިސްލާމީ ކަންތައްތަކާއި ބެހޭ ވުޒާރާއިން ބުނީ އެ އިއުލާނު ބާތިލުކުރަން ނިންމީ ރާއްޖޭގެ މާލީ ހާލަތާއި ގުޅިގެން އެފަދަ މަސައްކަތެއް ބަޔަކާއި ހަވާލުކޮށްގެން ކުރިޔަށް ގެންދިޔުން މިވަގުތު މުނާސަބު ނުވުމާއި އެކުގައި ކަމަށެވެ.

ނަމަވެސް މި މަސައްކަތް ސްޓެލްކޯގެ ސީއެސްއާރްގެ ދަށުން ކޮށްދިނުމުގެ ޝައުގުވެރިކަން ފާޅުކުރެއްވީ ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ އެވެ. މިއަދު އިސްލާމީ ކަންތައްތަކާއި ބެހޭ ވަޒީރު ޑރ މުހައްމަދު ޝަހީމް އާއި ބައްދަލުކުރެއްވުމަށްފަހު އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ ރާއްޖޭގެ ސަގާފީ އަދި ދީނީ ތަންތަން ހިމާޔަތްކުރުމަށް އެހީތެރިވުމުގެ ފުރުސަތުތައް ހޯދުމަކީ އެ ކުންފުންޏަށް ލިބޭ ޝަރަފެއް ކަމަށާއި އިސްލާމީ މަރުކަޒުގެ މުންނާރުގެ ތިރީގައި ވާ ފެންގަނޑަކީ ތާރީހީ މުހިންމު ތަނެއް ކަމުން އެ ތަނަކީ ވަރަށް ހިތްގައިމު ތަނެއްގެ ގޮތުގައި ތަރައްޤީކުރުމަށް ސްޓެލްކޯއިން ޝައުގުވެރިވާ ކަމަށެވެ.

މިގޮތުން މި މަސައްކަތް ކުރުމަށް އެވުޒާރާގެ ޓީމާއި ގުޅިގެން މަސައްކަތް ކުރަން އުންމީދު ކުރައްވާ ކަމަށްވެސް ފަހުމީ ވިދާޅުވިއެވެ.

އިސްލާމި މަރުކަޒަށް 40 އަހަރު ފުރޭނީ އަންނަ މަހުގެ 11 ވަނަ ދުވަހު އެވެ. އިސްލާމީ މަރުކަޒު ރަސްމީކޮށް ހުޅުވީ 1984 ވަނަ އަހަރުއެވެ.