ދެކުނު ސަރަޙައްދުގެ ކަސްޓަމްސް އޮފިސަރުންނަށް ޚާއްޞަ ތަމްރީނެއް ބާއްވައިފި

އައްޑޫ ސިޓީގެ މަރަދޫގައި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ ފަރާތުން ދެކުނު ސަރަޙައްދުގެ ކަސްޓަމްސް އެންފޯސްމަންޓް އޮފިސަރުންނަށް ޚާއްޞަ ތަމްރީނު ޕްރޮގްރާމެއް ކުރިޔަށް ގެންގޮސްފިއެވެ.

މި ތަމްރީނު ޕްރޮގްރާމުގެ މައިގަނޑު މަޤްޞަދަކީ ނެޝަނަލް އިމްޕްލިމެންޓޭޝަން އޮފް ދަ ކޮންވެންޝަން އޮން ދަ އިންޓަރނޭޝަނަލް ޓްރޭޑް އިން އެންޑޭންޖަރޑް ސްޕީޝީޒް (ސައިޓްސް) ގެ މަސައްކަތްތައް އިތުރަށް ހަރުދަނާކުރުމެވެ. މި މުޢާހަދާގެ ދަށުން ނެތިދިޔުމުގެ ބިރު ހީވެފައިވާ ދިރޭތަކެތީގެ ބައިނަލްއަޤްވާމީ ވިޔަފާރި ބެލެހެއްޓުމާއި ރެގިއުލޭޓްކުރުމުގެ މަސައްކަތްތައް ކުރެވެއެވެ.

މި ފަދަ ތަމްރީނު ޕްރޮގްރާމްތަކުން ކަސްޓަމްސް އޮފިސަރުންނަށް އެ ބޭފުޅުންގެ މަސައްކަތުގައި ދިމާވާ ގޮންޖެހުންތަކާ ކުރިމަތިލުމުގެ ޤާބިލުކަން އިތުރުވެގެންދާނެ ކަމަށް އެންވަޔަރަމަންޓް މިނިސްޓްރީން ބުނެއެވެ. އަދި މީގެ ސަބަބުން ރާއްޖޭގެ ތިމާވެށި ރައްކާތެރިކުރުމަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެ ކަމަށް ބެލެވޭ ކަމަށްވެސް ބުނެފައިވެއެވެ.

ދެ ދުވަހުގެ މުއްދަތަށް ކުރިއަށް ގެންދާ މި ތަމްރީނު ޕްރޮގްރާމުގައި ދެކުނު ސަރަޙައްދުގެ އެކި ރަށްރަށުން ޖުމްލަ 25 ކަސްޓަމްސް އޮފިސަރުން ބައިވެރިވެ ވަޑައިގަތެވެ.