ކަރަންޓު ހަރަދުކުޑަކުރުމަށް ފުވައްމުލަކުގައި މަގުބައްތިތައް ސްމާޓް ލައިޓްތަކަށް ބަދަލުކުރަނީ

ފުވައްމުލައް ސިޓީގެ މަގު ބައްތިތަކާއި އާންމު ސަރަހައްދުތަކުގައި ހުންނަ ބައްތިތައް ’ސްމާޓް ލައިޓިންގ‘ އަށް ބަދަލުކުރުމުގެ ގޮތުން ޓެސްޓު ކުރުމަށް ހިންގާ ޕައިލެޓް ޕްރޮޖެކްޓް ފަށައިފިއެވެ.

ފުވައްމުލައް ސިޓީ ކައުންސިލުން ބުނީ މި މަސައްކަތަކީ ޒަމާނީ ފަންނިއްޔާތާއި ރަށްޓެހި ސިޓީއަކަށް ފުވައްމުލައް ސިޓީ ބަދަލުކުރުމުގެ ގޮތުން ފުވައްމުލައް ސިޓީ ކައުންސިލުން ކުރަމުން އަންނަ މަސައްކަތްތަކުގެ ތެރެއިން ކުރެވޭ މަސައްކަތެއް ކަމަށެވެ.

އެގޮތުން މި ފެށުނު މަޝްރޫއުގެ އެހީގައި، ފުވައްމުލައް ސިޓީގެ މަގު ބައްތިތަކާއި އާންމު ތަންތަނުގައި ހުންނަ ބައްތިތައް ދިއްލުމާއި ނިއްވުން، އޭގެ އަލި ކޮންޓްރޯލް ކުރުމާއި އެއަށް ދިމާވާ މައްސަލަތައް ފަސޭހައިން އެނގިގެންދާނެ ކަމަށް ފުވައްމުލައް ސިޓީ ކައުންސިލުން ބުނެއެވެ. މިމަޝްރޫޢު ޓެސްޓު ކުރުމުގެ ގޮތުން މިވަގުތު ފުވައްމުލައް ސިޓީގެ 2 މަގު ބައްތި އަކާއި ކުޅިވަރު ކުޅޭ 4 ދަނޑެއް (20 ބައްތި) ވަނީ ބަދަލުކުރެވިފައެވެ. އާންމު މަގު ބައްތިތަކަށްވުރެ ތިމާވެއްޓާއި ރަށްޓެހި މިބައްތިތަކުގެ ސަބަބުން ބައްތިތަކަށް ކުރަންޖެހޭ ޚަރަދު ކުޑަކުރެވޭ ކަމަށްވެސް ކައުންސިލުން ބުނެފައިވެއެވެ. އެގޮތުން އަހަރެއްގެ މައްޗަށް 1 މިލިއަނާއި 2 މިލިއަން ރުފިޔާ ދެމެދުގެ އަދަދެއް ހަރަދުން ސަލާމަތްކުރެވޭނެ ކަމަށް ލަފާކުރެވޭ ކަމަށްވެސް ކައުންސިލުން ބުނެފައިވެއެވެ.

މިޓެސްޓްތަކަށް ފަހު މިއަންނައަހަރުން ފެށިގެން ބައްތިތަށް ސްމާޓް ލައިޓަށް ބަދަލު ކުރުމުގެ މަސައްކަތް ފެށިގެން ދާނެ ކަމަށް ކައުންސިލުން ބުނެފައިވެއެވެ. ކައުންސިލްގެ ޕްލޭނަކީ ދެއަހަރު ތެރޭ ސްމާޓް ލައިޓަށް ބަދަލުކޮށް ނިންމާލުން ކަމަށްވެސް ބުނެފައިވެއެވެ. މި މަސައްކަތް ކައުންސިލް ބަޖެޓުން ފެށިއަސް ކުރިއަށް އޮތްތަނުގައި މި ޕްރޮޖެކްޓަށް އެހީ ހޯދުމަށް ފަންޑުދޭ ފަރާތްތަކުގެ އެހީ ހޯދުމަށް މަސައްކަތް ކުރާނެ ކަމަށް ކައުންސިލުން ބުނެފައިވެއެވެ.

ފުވައްމުލައް ސިޓީ ކައުންސިލުން ފަންނިއްޔާތު ކުރިއަރުވައި މިއިދާރާއިން ފޯރުކޮށްދޭ ޚިދުމަތްތަކަކީ ރައްޔިތުންނަށް ލިބިގަތުމަށް ލުއިފަސޭހަ ޚިދުމަތަކަށް ހެދުމުގެ ގޮތުން މިހާތަނަށް އެއިދާރާއިން ފޯރުކޮށްދޭ 95 އިންސައްތަ ޚިދުމަތް އޮންލައިން ކޮށްފައިވާ ކަމަށް އެކައުންސިލުން ވަނީ ފާހަގަކޮށްފައެވެ. އެގޮތުން ސިޓީގެ މުނިސިޕަލް ޚިދުމަތްތަކާއި ގުޅުންހުރި ކަންބޮޑުވުންތައް ހިއްސާކުރެވޭ ގޮތަށް ’އަފުން ސިޓީ‘ ޕޯޓަލް އަންނަނީ ބޭނުންކުރަމުންނެވެ. މީގެ އިތުރުން ސިޓީއާއު ގުޅުންހުރި ކަންތައްތަކުގައި ރައްޔިތުންގެ ބައިވެރިވުން އިތުރުކުރުމުގެ ގޮތުން ’އަފުން އަޑޮ‘ ޕޯޓަލް ލޯންޗުކޮށް އަންނަނީ ބޭނުންކުރަމުންނެވެ. ސްމާޓް ސިޓީއަކަށް ފުވައްމުލައް ސިޓީ ބަދަލުކުރުމަށް ކުރަމުން އަންނަ މަސައްކަތްތަކުގައި ރައްޔިތުންގެ ފަރާތުން ލިބޭ އެއްބާރުލުމާއި އެހީތެރިކަން ފާހަގަކޮށް ސިޓީ ކައުންސިލުން ވަނީ ޝުކުރުއަދާކޮށްފައެވެ.