ހިޒްބުالله ގެ ސަފުތައް އަލުން ރުކުރުވާލަން އިރާނުން ޚާއްސަ ކޮމާންޑަރަކު ފޮނުވަނީ

ޔަހޫދީ އިޒްރޭލު އަސްކަރިއްޔާއިން ލުބުނާނަށް ދެމުން ގެންދާ ހަމަލާތަކާއި އެކު ހިޒްބުالله ގެ އިސް ލީޑަރުން އަވަހާރަވެ, ހިޒްބުالله ގެ ކުރިމަގާއި މެދު ސުވާލު އެފެދިފައިވާ ދަނޑިވަޅެއްގައި އެޖަމާއަތަށް އެހީވުމަށް އިރާނުން ކޮމާންޑަރެއް ފޮނުވަން ތައްޔާރުވެފައިވާ ކަމަށް ރިޕޯޓުތައް ބުނެފި އެވެ.

މިދިޔަ ހުކުރު ދުވަހު ލުބުނާނުގެ ވެރިރަށް ބެއިރޫތަށް ޔަހޫދީން ދިން ވަރުގަދަ ހަމަލާއެއްގައި ހިޒްބުالله ގެ އިސް ލިޑަރު ހަސަން ނަސްރަالله ވަނީ އަވަހާރަކޮށްލާފައި އެވެ. އަދި އޭގެ އިތުރުންވެސް ހިޒްބުالله ގެ އެހެނިގެން ބައެއް އިސްލީޑަރުން ވަނީ ދަނީ އަވަހާރަކޮށްލަމުންނެވެ. މިއާއި އެކު ހިޒްބުالله ގެ ކޮމާންޑާއި ހަވާލުވާނެ ފަރާތެއް އަދި މިހާތަނަށް ހަމަޖެހިފައި ނުވާއިރު ހިޒްބުالله ގެ ސަފުތައް އަލުން ރުކުރުވާލުމަށް ޚާއްސަ މަސައްކަތްތަކެއް ކުރަން އޮތީ ޖެހިފައި އެވެ.

ނަސްރަالله ގެ މަރުގެ ބަދަލު ހިފުމަކީ މިވަގުތު އެންމެ މުހިންމު ކަންތައް ނޫންކަމަށާއި މިވަގުތު އިރާނުގެ ފޯކަސްހުރީ ހިޒްބުالله ގެ ސަފުތައް ރުކުރުވާލައި ޖަމާއަތުގެ ކޮމާންޑު ކޮޅަށް ނެގުން ކަމަށް އިރާނުގެ ރިވޮލިއުޝަނަރީ ގާޑްސްގެ އިސް ދެ މެމްބަރަކު ވަނީ ނިއު ޔޯކް ޓައިމްސްއަށް ދިން އިންޓަވިއުއެއްގައި ބުނެފައި އެވެ.

ހިޒްބުالله އަށް އެންމެ ބޮޑަށް އެއްބާރުލުން ދޭ އަދި "ބެކް" ކުރާ ބަޔަކީ އިރާނުގެ ރިވޮލިއުޝަނަރީ ގާޑްސް އެވެ. ހިޒްބުالله މިޝަންތައް އަބަދްުވެސް ކުރަށްދަނި އިރާނުގެ ރިވޮލިއުޝަނަރީ ގާޑްސްގެ ލަފާއާއި އެކުގައި އެވެ.

ނިއުޔޯކް ޓައިމްސްއަށް މައުލޫމާތު ދިން އިރާނުގެ ރިވޮލިއުޝަނަރީ ގާޑްސްގެ ދެ މެމްބަރުން ބުނީ ހިޒްބުالله އަލުން ބިނާކުރުމާއި، ހަސަން ނަސްރުاللهގެ ބަދަލުގައި ކޮމާންޑަށް އެހެން ބޭފުޅަކު ކަނޑައެޅުމާއި، ކޮމާންޑް ސްޓްރަކްޗާއެއް ގާއިމުކުރުމާއި، ރައްކާތެރި މުވާސަލާތީ ނެޓްވޯކެއް އުފެއްދުމަކީ މިވަގުތު އެންމެ މުހިންމު ކަން ކަމަށެވެ.

މިއާއި އެކު މިކަންކަމަށް މަގު ފަހުކޮށްދިނުމަށްޓަކައި އީރާނުން ދަނީ ޤުދުސް ފޯސްގެ އިސް ކޮމާންޑަރަކު ސީރިއާ މަގުން ބެއިރޫތަށް ފޮނުވަން ތައްޔާރުވަމުން ކަން ވަނީ ހާމަކޮށްފައެވެ.