--
މާލީގެ ވެރިރަށް ބަމާކޯއަށް އަލްގައިދާއާ ގުޅުން ހުރި ޖަމާއަތަކުން މި ހަފުތާގެ ކުރީކޮޅު ދިން ހަމަލާއެއްގައި 70 އަށް ވުރެ ގިނަ މީހުން މަރުވެފައިވާ ކަމަށް ބެލެވޭ ކަމަށް ޑިޕްލޮމެޓިކް އަދި ސަލާމަތީ މަސްދަރުތަކުން ބުނެފި އެވެ.
ޖަމާއަތު ނުސްރަތު އަލް އިސްލާމް ވާ އަލް މުސްލިމީން (ޖޭއެންއައިއެމް) ގެ ހަރުކަށި ހަނގުރާމަވެރިން އަންގާރަ ދުވަހު އެލީޓް ޕޮލިސް ޓްރެއިނިން އެކަޑަމީއަކާއި ކައިރީގައި އޮންނަ އެއާޕޯޓަށް ދިން ހަމަލާއާ ގުޅިގެން ހުޅަނގު އެފްރިކާގެ ގައުމުގައި ވަނީ ހައިރާންކަމާއި ރުޅިވެރިކަން އުފެދިފަ އެވެ.
ނަން ނުޖެހުމަށް ޝަރުތުކޮށް ސަލާމަތީ މަސްދަރަކުން އޭއެފްޕީ ނިއުސް އެޖެންސީއަށް މައުލޫމާތު ދެމުން ބުނީ މި ހަމަލާގައި 77 މީހުން މަރުވެ 255 މީހުން ޒަޚަމްވެފައިވާ ކަމަށެވެ. އޭއެފްޕީން ބުނީ ސައްހަ ސިއްރު ރަސްމީ ލިޔުމެއްގައި މަރުވި މީހުންގެ އަދަދު ގާތްގަނޑަކަށް 100 އަށް އަރާފައިވާ ކަމަށާއި، މި ހާދިސާގައި މަރުވި 81 މީހުން ދެނެގަނެވިފައިވާ ކަމަށެވެ.
ބަމާކޯއަށް ނިސްބަތްވާ އެކަކު ހިމެނޭ ގޮތަށް އެ ސަރަހައްދުގައި މަސައްކަތް ކުރާ ދެ ޑިޕްލޮމެޓުން ރޮއިޓާސް ނިއުސް އެޖެންސީއަށް މައުލޫމާތު ދެމުން ބުނީ މަރުވި މީހުންގެ އަދަދު 70 އަށް އަރާ ކަމަށް ބެލެވޭ ކަމަށެވެ.
މީގެ ދިހަ ވަރަކަށް އަހަރު ކުރިން އެ ގައުމުގެ އުތުރުގައި ފެށި ހަތިޔާރު އެޅި ބަޣާވާތާ ދެކޮޅަށް އެ ގައުމުން ދަނީ ހަނގުރާމަ ކުރަމުންނެވެ. ސަހެލް ސަރަހައްދުގެ އަވަށްޓެރި ގައުމުތަކަށް ވެސް މި ހަމަލާތައް ފެތުރި އެތައް ހާސް ބަޔަކު މަރުވެ އެތައް މިލިއަން ބަޔަކު ގެދޮރު ދޫކޮށް ދާން މަޖުބޫރުވެފައިވެ އެވެ.
މާލީގެ އަސްކަރީ ވެރިން ވަނީ ބައެއް ގެއްލުންތައް ގަބޫލުކޮށްފަ އެވެ.
ޖޭއެންއައިއެމްއިން ބުނީ އެ ޖަމާއަތުގެ ބައެއް ހަނގުރާމަވެރިން ވަނީ ރަޝިއާގެ ކުލީ ސިފައިންގެ ޖަމާއަތެއް ކަމަށްވާ ވެގްނާގެ މެމްބަރުން ހިމެނޭ ގޮތަށް އިދިކޮޅު ސަފުތަކުގެ "އެތައް ސަތޭކަ ބަޔަކު" މަރާލައި ޒަހަމްކޮށްލާފައިވާ ކަމަށެވެ.
ފަހުގެ
