ވާދަވެރި ކުޅުމަކަށްފަހު އެސްއެސްއާރު އިން ޓީމު ޖުޑިޝަރީ ބަލިކޮށްފި

8 ވަނަ އޮފީސް/ކޮމްޕެނީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ސީގައި މިއަދު ހަވީރު ޓީމު ޖުޑިޝަރީ އާއި ސަން ސިޔާމް ރިސޯޓް (އެސްއެސްއާރު) ކުޅުނު މެޗު ވާދަވެރި ކުޅުމަކަށްފަހު 8-7 ގެ ނަތީޖާއަކުން އެސްއެސްއާރު ކާމިޔާބުކޮށްފިއެވެ.

މުބާރާތުގައި ޓީމު ޖުޑިޝަރީ ކުޅުނު ފުރަތަމަ މެޗުގައި ހުޅުމާލެ ހޮސްޕިޓަލާއި ވާދަކޮށް 18-08 ގެ ނަތީޖާއަކުން މޮޅުވިއިރު، ދެވަނަ މެޗުގައި އެޓީމުން ވަނީ 10-14 ގެ ނަތީޖާއަކުން އެމްސީސީ ބަލިކޮށްފައެވެ. އަދި އެސްއެސްއާރު ކުޅުނު ފުރަތަމަ މެޗުގައި 14-07 ގެ ނަތީޖާއަކުން އެމްސީސީ އަތުން މޮޅުވެފައިވާއިރު، މިއީ އެޓީމުގެ ދެވަނަ މެޗެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ތިން ލަނޑުގެ ލީޑަކާއެކު 5-2 ގެ ނަތީޖާއަކުން އެސްއެސްއާރު ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ޓީމު ޖުޑިޝަރީ އިން އެޓީމުގެ ކުޅުން ރަނގަޅުކުރިއިރު، މިހާފުގައި އެޓީމުން ވަނީ ފަސް ލަނޑު ކާމިޔާބުކޮށްފައެވެ. އަދި މިހާފުގައި އެސްއެސްއާރަށް ކާމިޔާބުކުރެވުނީ ހަތަރު ލަނޑެވެ.

އެގޮތުން މިމެޗުގައި އެސްއެސްއާރުގެ ފާތުމަތު ރިސްމާ ހަތް ލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ފާތުމަތު ޔުމްނާ އިބްރާހިމް އެވެ. އަދި މީގެ އިތުރުން މިމެޗުގައި ޓީމު ޖުޑިޝަރީގެ އައިޝަތު އީޝަލް އަލީ ހަތަރު ލަނޑު ކާމިޔާބުކުރިއިރު، އެޓީމުގެ އައިޝަތު ފަޒީލާ ދެލަނޑު އަދި އިތުމީނާ ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އެސްއެސްއާރުގެ ޝަހުދާ މުހައްމަދު އެވެ.

މިނަތީޖާއަކީ ކުޅުނު ދެމެޗުން އެސްއެސްއާރަށް ހަ ޕޮއިންޓް ލިބިފައިވާއިރު، މިމެޗުން ބަލިވި ޓީމު ޖުޑިޝަރީ ކުޅުނު ތިން މެޗުން އެޓީމަށް ވެސް ވަނީ ހަ ޕޮއިންޓް ލިބިފައެވެ.

މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަނުގައި 20 ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 20 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕެއްގައި ފަސް ޓީމު ހިމެނޭއިރު، ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުތުސަތު ލިބިގެންދާނެއެވެ.