ދުނިޔޭގައި ސިއްހީ ކުއްލިނުރައްކަލުގެ ހާލަތު އިއުލާންކޮށްފި

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދުނިޔޭގެ ސިއްހީ ކުއްލި ނުރައްކަލުގެ ހާލަތު އިއުލާން ކޮށްފި އެވެ.

އެ ޖަމިއްޔާއިން ސިއްހީ ކުއްލި ނުރައްކަލުގެ ހާލަތު އިއުލާން ކުރީ މަންކީ ޕޮކްސް ނުވަތަ އެމްޕޮކްސްގެ އައު ވޭރިއެންޓެއް އެފްރިކާގެ ގައުމުތަކުގައި ފެތުރެމުންދާތީ އެވެ.

ޑަބްލިއުއެޗްއޯ އިން ބުނީ އެފްރިކާ ބައްރުގެ 13 ގައުމަކުން އެމްޕޮކްސްގެ އައު ވެރިއެންޓް ހަލުވިކަމާއެކު ފެތުރެމުން އަންނަ ކަމަށެވެ. އަދި މިއީ 2 އަހަރު ތެރޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރި ދެވަނަ ފަހަރެވެ.

މި ބަލި އެންމެ ފުރަތަމަ ފެތުރެން ފެށީ ޑިމޮކްރެޓިކް ރިޕަބްލިކް އޮފް ކޮންގޯގައެވެ. އެއަށްފަހު ހަލުވިކަމާއެކު އެހެން ގައުމުތަކަށްވެސް ވަނީ މި ބަލި ފެތުރިފައެވެ.

މި ބަލިޖެހޭ މީހުންނަށް ފުރަތަމަ ރޯގާގެ އަލާމާތްތަކެއް ޖެހެއެވެ. އަދި އެއަށްފަހު ދިޔަ ހުންނަ ކުދި ބިހިތަކެއް މުޅިގައިގައި ނަގައެވެ. މި ބައްޔަކީ ފަރުވާދެވުނު ނަމަވެސް ބައެއް ހާލަތްތަކުގައި ފުރާނައަށް ނުރައްކާވާ ބައްޔެކެވެ. މި ބައްޔަކީ ގައިން ގަޔަށް އަރާ ބައްޔެކެވެ.

އެފްރިކާ ސެންޓަރ ފޯ ޑިޒީޒް ކޮންޓްރޯލް އެންޑް ޕްރިވެންޝަން އިން ބުނީ މިއަހަރުގެ މިހާތަނަށް އެފްރިކާބައްރުގައި 17000 އަށްވުރެ ގިނަ މީހުންނަށް ބަލި ޖެހިފައިވާ ކަމަށެވެ. މިއީ މިދިޔަ އަހަރުގެ މި މުއްދަތާ އަޅާ ބަލާއިރު 160 ޕަސެންޓް އިތުރު އަދަދެއް ކަމަށްވެސް އެއިދާރާއިން ބުނެފައިވެއެވެ. މި އަހަރު މިހާތަނަށް އެ ބަލީގައި 517މީހަކު މަރުވެފައިވާ ކަމަށްވެސް އެއިދާރާއިން ބުނެފައިވެއެވެ.