ޙަޤީޤީ ރައްޔިތުންގެ ވެރިކަމެއްގެ އިހުސާސް ރައްޔިތުންނަށް ކުރެވިއްޖެ - ފަހުމީ

ޙަޤީޤީ ރައްޔިތުންގެ ވެރިކަމެއްގެ އިހުސާސް ރައްޔިތުންނަށް މިހާރު ކުރެވޭ ކަމަށް ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ފަހުމީ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ މިހާރު ރާއްޖެއަށް ކުރަމުންދާ ވިއްސާރައާއި ގުޅިގެން ރައީސުލްޖުމްހޫރިއްޔާ ޑރ މުހައްަމަދު މުއިއްޒު ހުންނެވީ، ރައްޔިތުންގެ ޙާލު ގާތުން ބައްލަވައި، ރައްޔިތުންނަށް ބޭނުންވާ އެހީތެރިކަން ފޯރުކޮށްދެއްވުމަށް ޓާސްކްފޯސްއެއް އުފައްދަވައި ސާބިތުކަމާއެކު އަމަލީ މައިދާނުގައި ކަމަށެވެ.

އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله ވެސް ހުންނެވީ ރައްޔިތުންނަށް ލިބެމުންދާ ގެއްލުންތައް ބައްލަވާލައްވައި، ވިއްސާރައިގައި ގެއްލުންވަމުންދާ އެންމެހާ ފަރާތްތަކަށް އެހީތެރިކަން ފޯރުކޮށްދެއްވުމަށް ރައީސް ދެއްވާފައިވާ ޔަޤީންކަމާއި އެއްގޮތަށް ސަރުކާރުގެ އެކި އިދާރާތަކުން ކުރަމުންގެންދާ މަސައްކަތްތައް ކައިރިން ބައްލަވައިލައްވައި، އިރުޝާދު ދެއްވުމުގެ މަސައްކަތުގައި ކަމަށެވެ.

ހަމައެއާއި އެކު ދައުލަތުގެ ވަޒީރުން ތިއްބެވީ ރައްޔިތުންގެ ޙާލު ގާތުން ބައްލަވައި ރައީސްގެ ހަރުދަނާ އިރުޝާދުތައް ތަންފީޒުކުރެއްވުމުގެ މަސައްކަތުގައި ކަމަށާއި ސަރުކާރަށް ތާޢީދުކުރައްވާ ރައްޔިތުންގެ މަޖިލީހުގެ މެމްބަރުން ތިއްބެވީ ރައްޔިތުންނާއިއެކު، އެ ރައްޔިތުންގެ ގެތަކަށް ފެންވަނުން ކޮންޓްރޯލްކުރުމަށް ވެލިބަސްތާ ޖެހުމުގެ މަސައްކަތުގައި ކަންވެސް ފަހުމީ ފާހަގަކުރެއްވި އެވެ.

މީގެ އިތުރުން ސަރުކާރުގެ އިދާރާތަކާއި، ދައުލަތުގެ އެހެނިހެން މުއައްސަސާތަކާއި، ސަރުކާރުގެ ކުންފުނިތައް އޮތީ ރައްޔިތުންގެ ޚިދުމަތުގައި އެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށް ކުރަންޖެހޭ ހުރިހާ މަސައްކަތެއް ކުރުމުގައި ކަމަށް ވެސް ފަހުމީ ވިދާޅުވިއެވެ.

ރާއްޖެއަށް އިއްޔެ ކުރި ވިއްސާރާގައި މާލޭގައި ވަރަށް ބޮޑަށް ފެންބޮޑުވި އިރު މުޅި ދައުލަތް އޮތީ އެ ހާލަތުން މުޅި ރާއްޖެ އާންމު ހާލަތަކަށް ގެނައުމަށްޓަކައި މަސައްކަތްކުރުމުގައި އެވެ. މިއާއި އެކު ދައުލަތުން ކުރަމުން ދިޔަ މަސައްކަތްތަކަށް ގިނަ ބަޔެއްގެ ތައުރީފް އަންނަނީ ލިބެމުންނެވެ.