ވިއްސާރާގައި ލިބިދާނެ ގެއްލުންތަކަށް އިޖާބަ ދިނުމަށް ސިފައިން ތިބީ ތައްޔާރުވެގެން - ޣައްސާން

މިހާރު ރާއްޖެއަށް ކުރަމުން އަންނަ ވިއްސާރާގައި ލިބެމުންދާ ގެއްލުންތަކަށް އިޖާބަދީ ރައްޔިތުންނަށް ދޭން ޖެހޭ އެހީތެރިކަން ދިނުމަށް ސިފައިން ތިބީ ފުރިހަމައަށް ތައްުޔާރުވެގެންކަމަށް ދިފާއީ ވަޒީރު ޣައްސާން މައުމޫން ވިދާޅުވެއްޖެ އެވެ.

ޣައްސާން މިފަދައިން ވިދާޅުވީ މިހާރު މާލެ އަށް ކުރަމުން އަންނަ ވިއްސާރައާއި އެކު މާލޭގެ މަގުތަކުން ފެންހިންދުމުގެ މަސައްކަތް ކުރުމަށް އަމަލީ ގޮތުން މަގުމައްޗަށް ނުކުމެ ވަޑައިގެން ހުންނަވައި މިއަދު ދައުލަތުގެ މިޑިއާ ޕީއެސްއެމްއަށް ދެއްވި ޚާއްސަ އިންޓަވިއުއެއްގައި އެވެ.

އެގޮތުން ޣައްސާން ވިދާޅުވީ މާލޭގެ މަގުތަކުގެ ފެން ހިއްދުމަށްޓަކައި ސިފައިންގެ ހުރިހާ ފެން ޕަމްޕުތަކެއް މިހާރު މަގުތަކަށް ނެރެވިފައިވާ ކަމަށާއި އެންމެ ބޮޑު ޕަމްޕުގެ ގޮތުގައި ބޭނުންކުރަމުންދާ ޓްރެއިލާ ޕަމްޕުން މިނިޓަކު 3000 ލީޓަރުގެ ފެން ބޭރުކުރަމުންދާ ކަމަށެވެ. އަދި މި މަސައްކަތްތަކާއި އެކު ވާރޭ ހުއްޓާލާހާ އަވަހަކަށް މާލޭގެ މަގުތަކުގެ ފެން ހިންދި މަގުތައް އާންމު ހާލަތަށް ގެނެވިގެންދާނެ ކަންވެސް ވަޒިރު ހާމަކުރެއްވި އެވެ.

ވަޒީރު އިތުރަށް ވިދާޅުވީ ސިފައިންެގެ އެންމެ އިސް ވެރިޔާ ރައީސް ޑރ މުހައްމަދު މުއިއްޒުގެ އަމުރުފުޅަށް ސިފައިންގެ މާލެ އޭރިއާގެ ސިފައިން މިހާރު މަގުތަކުގެ ފެން ހިންދުމަށާއި ރައްޔިތުންނަށް ލިބެމުންދާ ގެއްލުންތަކާއި އެކު އެހީތެރިވުމަށް މަގުތަކަށް ނެރެފައިވާ ކަމަށެވެ. އަދި ކުރިޔަށް އޮތް ދެދުވަހުވެސް މޫސުން ގޯސްވާނެ ކަމަށް ލަފާކޮށްފައިވާތީ އެކަމަށްވެސް ފުރިހަމައަށް ތައްޔާރުވެފައިވާ ކަމަށާއި ސިފައިންގެ ހުރިހާ ވަސީލަތްތަކެއް މިހާލަތުގައި ބޭނުންކުރާނެ ކަމުގެ ޔަގީންކަންވެސް ވަޒީރު ވަނީ ދެއްވާފައި އެވެ.

މިހާރު ރާެއްޖެ އަށް ކުރަމުން އަންނަ ވިއްސާރާގައި ރާއްޖޭގެ އެކި ކަންކޮޅުތަކުގައި އަންނަނީ ފެންބޮޑުވުމުގެ ހާދިސާތައް ހިނގަމުންނެވެ. މިއާއި އެކު އެކި ސަރަހައްދުތަކުގައި ސިފައިން ދަނީ ހަރަކާތްތެރިވަމުންނެވެ.