ބަންގްލަދޭޝްގެ ބޮޑުވަޒީރު ހަސީނާގެ އިސްތިއުފާއަށް ގޮވާލާ މިއަދު ކުރިޔަށްދާ މުޒާހަރާތައް ހޫނުވެ 20 މީހުން މަރުވެއްޖެ

ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިސްތިއުފާއަށް ގޮވާލާ އެގައުމުގެ މަގުތަކަށް ގިނަ ބަޔަކު ނުކުމެ ކުރަމުން އަންނަ މުޒާހަރާތައް ހޫނުވެ ފުލުހުން ކަރުނަ ގޭސް ޖަހައި، ސްޓަން ގްރެނޭޑް ތަކެއް ގޮއްވާލުމުން 20 އަށް ވުރެ ގިނަ މީހުން މަރުވެ އެތައް ބަޔަކު ޒަހަމްވެއްޖެ އެވެ.

ވެރިރަށް ޑާކާއާއި އުތުރުގެ ޑިސްޓްރިކްޓްތައް ކަމަށްވާ ބޮގުރާ، ޕަބްނާ އަދި ރަންގްޕޫރުގެ އިތުރުން ހުޅަނގުގެ މަގުރާ، އިރުމަތީގެ ކޮމިއްލާ އަދި ދެކުނުގެ ބަރިސަލް އަދި ފެނީގައި ހިނގަމުން އަންނަ މި ހަމަނުޖެހުންތަކުގައި އެތައް ބަޔަކު މަރުވެފައިވާ ކަން އެގައުމުގެ ފުލުހުންނާއި ޑޮކްޓަރުން އަންނަނީ ނޫސްތަކަށް ކަށަވަރުކޮށްދެމުންނެވެ.

ރިޕޯޓުތައް ބުނާ ގޮތުގައި ކުރިއަށް އޮތް ގަޑިތަކުގައި ކާފިއު އިއުލާންކުރަން އެގައުމުގެ ސަރުކާރުން ތައްޔާރުވަމުން އަންނަ އިރު، މުވާސަލާތީ ހިދުމަތް ތައް މިހާރު ވެސް ވަނީ ކަނޑާލައިފަ އެވެ.

ހަސީނާގެ އިސްތިއުފާއަށް މުޒާހަރާގެ ބައިވެރިން ގޮވާލީ ސަރުކާރުގެ ވަޒީފާތަކަށް ކޯޓާ ގެނައުމުގެ ނިޒާމު ނިމުމަކަށް ގެނައުމަށް ގޮވާލައި މިދިޔަ ޖުލައި މަހު ފެށި މުޒާހަރާތައް ހަމަނުޖެހުންތަކަކަށް ބަދަލުވެ 200 އަށް ވުރެ ގިނަ މީހުން މަރުވުމާ ގުޅިގެންނެވެ.

އަލްޖަޒީރާގެ ތަންވީރު ޗައުދަރީ، ވެރިރަށުން ރިޕޯޓް ކުރަމުން އަންނަ އިރު، އެގައުމުގެ ހާލަތު އޭނާ ސިފަކޮށްފައި ވަނީ "ހަލަބޮލި އަދި ނުރައްކާތެރި" ހާލަތެއްގެ ގޮތުގަ އެވެ.