ބަންގްލަދޭޝް އިންތިގާލީ ސަރުކާރުގެ ވެރިޔާއަށް ރައީސް މުއިއްޒު މަރުހަބާ ވިދާޅުވެއްޖެ

ބަންގްލަދޭޝް އިންތިގާލީ ސަރުކާރުގެ ވެރިޔާކަމުގެ ހުވާކުރެއްވި މުހައްމަދު ޔޫނުސް އަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.

އެކްސްގައި ހިއްސާކުރެއްވި ޕޯސްޓެއްގައި ރައީސް މުއިއްޒު ވިދާޅުވީ, ބަންގްލަދޭޝްގެ އިންތިގާލީ ސަރުކާރުގެ ޗީފް އެޑްވައިޒަރުގެ މަގާމަށް އައްޔަންކުރެއްވި ޑރ.މުޙައްމަދު ޔޫނުސް އަށް މަރުހަބާ ދަންނަވާ ކަމަށެވެ.

އުމުރުން 84 އަހަރުގެ ޔޫނުސް, ބަންގްލަދޭޝްގެ އިންތިގާލީ ސަރުކާރުގެ ވެރިޔާ ކަމުގެ ހުވާ ކުރެއްވީ މިރޭ ޑާކާގައި ބޭއްވި ހާއްސަ ރަސްމިއްޔާތެއްގައެވެ.

ބަންގްލަދޭޝްގައި އިންތިގާލީ ސަރުކާރެއް އެކުލަވައިލަން ނިންމީ, ދަރިވަރުން އިސްނަގައިގެން އެތައްދުވަހެއް ވަންދެން ކުރި މުޒާހަރާތަކުގެ ސަބަބުން އެގައުމުގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވައި އަވަށްޓެރި އިންޑިއާއަށް ފިއްލަވައިގެން ވަޑައިގަތުމުންނެވެ.

ނޯބެލް ސުލްހައިގެ އިނާމް ހޯއްދަވާފައިވާ ޔޫނުސްއަށް ދެން އޮތް އެންމެ ބޮޑު މަސައްކަތަކީ, ބަންގްލަދޭޝްގެ ހަމަޖެހުން ގާއިމުކޮށް އާ އިންތިހާބަކަށް ތައްޔާރުވުމެވެ.