އޮލިމްޕިކްސް/ފުޓްބޯޅަ: ޖަޕާން ކަޓުވާލުމަށްފަހު ސްޕެއިން ސެމީއަށް

ފްރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކްސް ފުޓްބޯޅަ ފިރިހެން އިވެންޓްގެ ކުއާޓާ ފައިނަލުގައި 3-0 ގެ ނަތީޖާއަކުން ޖަޕާން ބަލިކޮށް މުބާރާތުގެ ސެމީ ފައިނަލުން ސްޕެއިން ޖާގަހޯދައިފިއެވެ.

ސްޕެއިން ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެމެޗުން މޮޅު، އެއް މެޗުން ބަލިވެ، ލިބުނު ހަ ޕޮއިންޓާއެކު ގުރޫޕް ސީގެ ދެވަނަ ޓީމުގެ ގޮތުގައެވެ. އަދި ޖަޕާން ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ ނުވަ ޕޮއިންޓާއެކު ގުރޫޕް ޑީގެ އެއްވަނަ ޓީމުގެ ގޮތުގައެވެ.

މިމެޗުގައި ސްޕެއިންގެ ބާސެލޯނާ މިޑްފީލްޑަރު ފާމިން ލޮޕޭޒް ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ޖިރޯނާގެ ފޯވާޑް އަބެލް ރުއިޒްއެވެ. މީގެ އިތުރުން މެޗުގެ ފުރަތަމަ ހާފުގައި ޖަޕާނުން ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މުބާރާތުގެ ސެމީފައިނަލްގައި މިމަހުގެ ފަސްވަނަ ދުވަހު ސްޕެއިން ނުކުންނާނީ ކުއާޓާ ފައިނަލުގެ ދެވަނަ މެޗުގައި 4-0 ގެ ނަތީޖާއަކުން އެމެރިކާ ބަލިކޮށް ސެމީ ފައިނަލުން ޖާގަހޯދި މޮރޮކޯ އާއި ދެކޮޅަށެވެ.