މޯލްޑިވިއަންއިން ޑޮމެސްޓިކް ފަސިންޖަރުންނަށް ޓިކެޓާއެކު ލައުންޖް އެކްސެސް ބުކް ކުރެވޭނެ އިންތިޒާމު ހަމަޖައްސައިފި

ރާއްޖޭގެ ގައުމީ އެއާލައިން, މޯލްޑިވިއަންއިން ޑޮމެސްޓިކް ފަސިންޖަރުންނަށް ޓިކެޓާއެކު ލައުންޖް އެކްސެސް ބުކް ކުރެވޭނެ އިންތިޒާމު ހަމަޖައްސައިފި އެވެ.

މޯލްޑިވިއަންއިން ބުނީ މި ހިދުމަތް ތައާރަފްކޮށްފައިވަނީ އެތެރޭގެ އުދުހުންތަކުގެ ޓިކެޓުތަކުގެ ތެރެއިން އެޑްއޮންއެއްގެ ގޮތުގައި ކަމަށެވެ. އެގޮތުން ދަތުރުކުރައްވާ ފަރާތްތަކުން އެއާލައިންގެ ކޯލް ސެންޓަރާއި ޓިކެޓިން އޮފީހާއި ވައިބާ އަދި ސޭލްސް އެޖެންޓުން މެދުވެރިކޮށް ލައުންޖް އެކްސެސް ބުކް ކުރެވޭނެ ކަމަށް މޯލްޑިވިއަންއިން ބުނެއެވެ. ލައުންޖް އެކްސެސް ފުރުމުގެ 4 ގަޑިއިރު ކުރިން ބުކް ކުރެވޭނެ ކަމަށް މޯލްޑިވިއަންއިން ބުނެއެވެ.

މޯލްޑިވިއަންއިން ބބުނީ މި ހިދުމަތް ތައާރަފްކުރުމުގެ މަގުސަދަކީ ވިޔަފާރިއަށް ނުވަތަ އަމިއްލަ ދަތުރުތަކުގައި ދަތުރުކުރާއިރު ފަސިންޖަރުން ޗެކިންއަށްފަހު ފްލައިޓް ފުރާ ގަޑިއާއި ދޭތެރޭ އެހޭދަކުރާ ވަގުތަކީ ހިތްހަމަޖެހޭ އަދި ހިތްފަސޭހަ ވަގުތެއް އަދި މާހައުލެއް ހޯދައިދިނުން ކަމަށެވެ.

މޯލްޑިވިއަންގެ ލައުންޖުތައް

1. މޫނިމާ ލައުންޖް: ޑޮމެސްޓިކް ޓާމިނަލް / ވެލާނާ އިންޓަނޭޝަނަލް އެއާޕޯޓު
2. ކަޝިމާ ލައުންޖް: ދަރަވަންދޫ ޑޮމެސްޓިކް އެއާޕޯޓު
3. ކާނީ ލައުންޖް: އިފުރު ޑޮމެސްޓިކް އެއާޕޯޓު

މޯލްޑިވިއަންގެ ލައުންޖުތަކުން ކޮމްޕްލިމެންޓަރީ ވައިފައި، ތަފާތު ކާބޯތަކެތީގެ އޮޕްޝަންތަކާއި، ތާޒާ ބުއިންތަކާއި، އަރާމުކޮށް އިށީނދެތިބެވޭނެ އޮޕްޝަންތައް ލިބެން ހުންނާނެއެވެ.

މޯލްޑިވިއަންއަކީ ރާއްޖޭގެ ހުރިހާ ޑޮމެސްޓިކް މަންޒިލްތަކަށް ދަތުރުތައް ކުރާ ހަމައެކަނި އެއާލައިންއެވެ.