ޕްރޮސެސިން ކެެޕޭސިޓީ އިތުރުކުރެވުމުން މަހުގެ އެކްސްޕޯޓުން ލިބޭ އާމްދަނީ 190 މިލިއަން ޑޮލަރަށް އަރާނެ : ވަޒީރު

ސަރުކާރުގެ މަސް ކުންފުނި، މިފްކޯގެ ޕްރޮސެސިން ކެޕޭސިޓީ އިތުރުކުރެވުމުން މަސް ބޭރުކޮށްގެން ރާއްޖެއަށް ލިބޭ އާމްދަނީ 190 މިލިއަން ޑޮލަރަށް އިތުރުކުރެވޭނެ ކަމަށް ވަޒީރު އަޙުމަދު ޝިޔާމް ވިދާޅުވެއްޖެއެވެ.

"އެސްއެސް ޓީވީ" ގެ ޕްރޮގްރާމެއްގައި ބައިވެރިވެވަޑައިގެން ވަޒީރު ޝިޔާމް ރޭ ވިދާޅުވީ، މިފްކޯގެ ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަ ކަމަށާއި އެގޮތުން، ޅ. ފެލިވަރާއި ފ. ނިލަންދޫގެ އިތުރުން ގދ. ފިޔޯރީގައި މަސް ބަންދު ކުރާ ފެކްޓްރީތައް ގާއިމުކުރުމުގެ މަސައްކަތްތައް ކުރަމުން އަންނަ ކަމަށް ވިދާޅުވިއެވެ.

ވަޒީރު ވިދާޅުވީ، މިހާރު މިފްކޯގައި ހުރީ 40 މެޓްރިކްޓަނުގެ ޕްރޮސެސިން ކެޕޭސިޓީއެއް ކަމަށާއި އެ ފެކްޓަރީތައް އޮޕަރޭޝަނަލައިޒް ކުރެވުމުން، މިފްކޯގެ ޕްރޮސެސިން ކެޕޭސިޓީ 300 މެޓްރިކްޓަނަށް ބަދަލުވެގެންދާނެ ކަމަށެވެ.

ވަޒީރު ވިދާޅުވީ، ރާއްޖެއިން މިހާރު 128،000 ނުވަތަ 130،000 މެޓްރިކްޓަނުގެ މަސް ބާނާކަމަށެވެ. އަދި އެ ހުރިހާ މަހެއް ޕްރޮސެސްކުރެވޭ ނަމަ މަސް ބޭރުކޮށްގެން މިހާރު ލިބޭ 90 މިލިއަން ޑޮލަރު 180 ނުވަތަ 190 މިލިއަން ޑޮލަރަށް އިތުރުކުރެވޭނެ ކަމަށެވެ.

ވަޒީރު ވިދާޅުވީ މި މަސައްކަތް ފުރިހަމަ ކުރުމަށް ދޮޅު އަހަރެއްހާ ދުވަސް ނަގާނެ ކަމަށާއި ސަރުކާރުގެ އަމާޒަކީ ވީހާވެސް އަވަހަކަށް އެމަސައްކަތް ނިންމާލުން ކަމަށެވެ.

ވަޒީރު ލަފާކުރައްވާ ގޮތުގައި މިފްކޯގެ ޕްރޮސެސިން ކެޕޭސިޓީ އިތުރުކުރަން ދޮޅު އަހަރެއްހާ ދުވަސް ނަގާނެ ކަމަށެވެ.