މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދެވަނަ ބުރު ނިންމާލައިފި

ސަރުކާރުގެ ހަފުތާ 14 ގެ ހަރަކާތްތަކުގެ ތެރެއިން އިފްތިތާހު ކުރި މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދަށުން ހިންގޭ ދެވަނަ ބޭސިކް މެރިކަލްޗަރ ކޯސް ނިންމުމުގެ ރަސްމިއްޔާތު މަނިޔަފުށީ ރިސާރޗް އެންޑް ޓްރެއިނިންގ ފެސިލިޓީގައި މިއަދު ބާއްވައިފިއެވެ.

މި ރަސްމިއްޔާތު ޝަރަފުވެރިކޮށްދެއްވާ ކޯހުގެ ބައިވެރިންނަށް ސެޓްފިކެޓް ހަވާލުކޮށްދެއްވީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އެވެ.

14 ދުވަހުގެ މުއްދަތަށް ކުރިއަށް ގެންދިޔަ މިކޯހުގައި ރާއްޖޭގެ އެކި ކަންކޮޅުތަކުން ޖުމުލަ 16 ފަރާތަކުން މިފަހަރު ބައިވެރިވެފައިވެއެވެ. ވަރލްޑް ބޭންކުގެ އެހީގައި މިނިސްޓްރީން ހިންގާ ޓްރާންސްފޯމް ޕްރޮޖެކްޓުގެ އެހީތެރިކަމާއިއެކު މޯލްޑިވްސް މެރިން ރިސާރޗް އިންސްޓިޓިއުޓުން ހިންގި މި ކޯހުގެ މަގުސަދަކީ، ރާއްޖޭގައި މެރިކަލްޗަރ ސިނާއަތެއް ތައާރަފުކޮށް ތަރައްޤީކުރުމަށް ބޭނުންވާ ދިވެހި ފަންނުވެރިން އުފެއްދުމެވެ.

މިގޮތުން، އެކުއަކަލްޗަރގެ ނިޒާމުތަކާއި، ދިރޭ ކާނާ އާލާކުރުމާއި، ފާނަޔާއި ހުއިފިލަނޑަޔާއި ދިވެހި މާގަނޑުމަސް އަދި އިތާމުތް އާލާކުރުމާއި، އާލާ ކުރާ ބާވަތްތަކަށް ޖެހޭ ބަލިތައް ދެނެގަނެ ބަލިތަކުން ރައްކާތެރިކުރުމާއި، މެރިކަލްޗަރ މަސައްކަތްތައް ކުރުމުގައި ތިމާވެށްޓަށް ގެއްލުން ކުޑަވާގޮތަށް އެ މަސައްކަތް ކުރުމާ ގުޅޭގޮތުން މައުލޫމާތު ދިނުމުގެ އިތުރުން، ފާނަޔާއި ހުއިފިލަނޑާ އަދި މާގަނޑުމަސް އާލާކުރުމުގެ އަމަލީ ތަޖުރިބާ ކޯހުގެ ބައިވެރިންނަށް ފޯރުކޮށްދީފައިވެއެވެ.

މިފަހަރުގެ މި ކޯސް ފުރިހަމަކުރި 14 ފަރާތާއިއެކު މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދަށުން މިހާތަނަށް ޖުމުލަ 26 ފަރާތަކަށް ތަމްރީނު ދެވިފައި ވެއެވެ. މެރިކަލްޗަރ ސިނާއީ ފެންވަރެއްގައި ރާއްޖޭގައި ކުރިއަށް ގެންދިއުމަކީ، ރާއްޖޭގެ އިޤްތިޞާދު ސިންދަފާތުކޮށް، ބޭރު ފައިސާއިން ލިބޭ އާމްދަނީ އިތުރުކުރުމަށްޓަކައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން އިސްކަންދޭ ކަމެކެވެ. މިކަމަށް މަގުފަހިކުރުމަށްޓަކައި މެރިކަލްޗަރ ތަރައްޤީކުރުމަށް 4 ޒޯނެއް ކަނޑައެޅުމުގެ އިތުރުން، މަނިޔަފުށްޓާއި ގާތްގަނޑަކަށް 2 ކިލޯމީޓަރު ދުރުގައި އޮންނަ ފަޅެއް، މެރިކަލްޗަރ ކުރުމަށް މިހާރު ވަނީ ކަނޑައަޅާފައެވެ. އޭގެ އިތުރުން، މެރިކަލްޗަރގެ ސިނާޢަތު، ބާރު ދުވެއްޔެއްގައި ކުރިއެރުވުމަށްޓަކައި، މެރިކަލްޗަރ ޒޯންތަކުގައި ހަރަކާތްތެރިވާ ފޮރިން އިންވެސްޓަރުންނަށް ގިނަގުނަ ލުއިތަކެއް ދިނުމަށްވެސް ވަނީ ސަރުކާރުން ނިންމަވާފައެވެއެވެ.