ބަންގާޅު ހަމަނުޖެހުން: މުޒާހަރާތައް ރޭވުމުގައި އިސްކޮށް ހަރަކާތްތެރިވި 3 ދަރިވަރަކު ހައްޔަރަށް!

ބަންގްލަދޭޝްގެ އެކި ކަންކޮޅުތަކުގައި ދާދި ފަހުން ހިނގި ނުރައްކާތެރި ހަމަނުޖެހުންތަކާއި ގުޅިގެން ސަރުކާރުގެ ވަޒީފާގެ ކޯޓާއާ ދެކޮޅަށް އެއްވުންތައް ބޭއްވުމުގައި އެހީތެރިވި ތިން ދަރިވަރަކު އެގައުމުގެ ސަލާމަތީ ބާރު ތަކުން ހައްޔަރުކޮށްފި އެވެ.

ރިޕޯޓްތައް ބުނާ ގޮތުން އިއްޔެ ވެރިރަށް ޑާކާގެ ގޮނޯޝަސްތާޔާ ސެންޓަރު ހޮސްޕިޓަލުން ސްޓޫޑެންޓްސް އެގެއިންސްޓް ޑިސްކްރިމިނޭޝަން މޫވްމަންޓްގެ ތިން ލީޑަރުން ދޫކޮށްލަން އޮފިސަރުން މަޖުބޫރުކުރި އެވެ. އަދި އެމީހުން ހޮސްޕިޓަލުން ދޫކޮށްލުމާއި އެކު ވަނީ ސަލާމަތީ ބާރުތަކުން ހައްޔަރުކޮށްފައެވެ.

ނާހިދު އިސްލާމް އާއި އަބޫ ބަކަރު މަޒުމްދާރު އަދި އާސިފް މަހުމޫދު ފުލުހުންގެ ބެލުމުގެ ދަށަށް ގެންގޮސްފައިވާ ކަން ފުރަތަމަ ފުލުހުން ދޮގު ކުރި ނަމަވެސް އޭގެ ފަހުން ހޯމް މިނިސްޓަރު އަސަދުއްޒަމާން ޚާން ނޫސްވެރިންނާ ވާހަކަ ދައްކަވަމުން ވިދާޅުވީ އެ މީހުން ސަލާމަތީ ބާރުތަކުގެ ބެލުމުގެ ދަށަށް ގެންދިޔައީ އެމީހުންގެ ރައްކާތެރިކަމަށް ކަމަށެވެ.

އެ ތިން މީހުން ރަސްމީކޮށް ހައްޔަރުކުރިކަން އިމްރާން ކަށަވަރު ކޮށްނުދިން ނަމަވެސް ހުކުރު ދުވަހުގެ ރޭ ނޫސްވެރިންނާ ވާހަކަ ދައްކަވަމުން އިމްރާން ވިދާޅުވީ އެ މީހުންގެ އަމިއްލަ ސެކިއުރިޓީއަށް ޓަކައި އެ މީހުންނާ ސުވާލުކުރަން ޖެހޭ ކަމަށެވެ. "ސުވާލުކުރުމަށްފަހު ދެން އަޅާނެ ފިޔަވަޅެއް އަޅާނަން." އޭނާ ވިދާޅުވިއެވެ.

ސަރުކާރަށް ތާއީދު ކުރާ ދަރިވަރުންގެ ޖަމާއަތްތަކުން ކޯޓާ އާއި ދެކޮޅަށް މުޒާހަރާކުރަމުން ދިޔަ ދަރިވަރުންގެ އެއްވުންތަކަށް ހަމަލާދިނުމާ ގުޅިގެން މިދިޔަ ހަފުތާގައި މުޒާހަރާތައް ހަމަނުޖެހުންތަކަށް ބަދަލުވެ 150 މީހުން މަރުވެ އެތައް ހާސް ބަޔަކު ވަނީ ހައްޔަރުކޮށްފަ އެވެ.

މި މުޒާހަރާތަކަކީ 1971 ވަނަ އަހަރު ޕާކިސްތާނުގެ ކިބައިން ބަންގްލަދޭޝް މިނިވަންވުމުގެ ހަނގުރާމައިގައި ބައިވެރިވި މީހުންގެ އާއިލާގެ މެމްބަރުންނަށް ސަރުކާރުގެ ވަޒީފާގެ 30 ޕަސެންޓް ހާއްސަކުރާ ކޯޓާ ސިސްޓަމާ ދެކޮޅު ހެދުމުގެ މަގްސަދުގައި ކުރިއަށް ގެންދިޔަ މުޒާހަރާތަކެކެވެ. މި މުޒާހަރާތައް ހޫނުވެގެންދިޔައީ ފުލުހުންނާއި ސަރުކާރަށް ތާއީދު ކުރާ ފަރާތްތަކުން ދަރިވަރުންނަށް އަމާޒުކޮށް ހަމަލާދޭން ފެށުމުންނެވެ.