16 ޓީމާއެކު ލޮކާޒް މިނީ ފުޓްސަލް މުބާރާތް މިއަދު ފަށަނީ

ތިނަދޫގައި ކުރިއަށް ގެންދާ ފޯރިގަދަ ފުޓްސަލް މުބާރާތް މިއަދު ހަވީރު ފެށުމަށް ތައްޔާރުވެއްޖެ އެވެ.

ލޮކާޒް މިނީ ފުޓްސަލް މުބާރާތަކީ 2023ވަނަ އަހަރުން ފެށިގެން ތިނަދޫގެ ފުޓްބޯޅައަށް ލޯބިކުރާ ފަރާތްތަކަށް ހާއްސަކޮށްގެން ބާއްވަމުން އަންނަ މުބާރާތެކެވެ.

މި މުބާރާތް ހުޅުވާ މެޗުގައި މިއަދު ހަވީރު ބައްދަލުކުރާނީ ޓަކާޓާ އާއި ސްކޯޕިއަންސް އެވެ. ޓަކާޓާއަކީ 2023ވަނަ އަހަރުގައި ބޭއްވުނު މުބާރާުގެ ޗެމްޕިއަން ޓީމެވެ.

މިއަހަރުގެ މުބާރާތުގައި 16 ޓީމަކުން ބައިވެރިވެފައިވާއިރު, އޭގެ ތެރޭގައި ރަށުން ބޭރު 1 ޓީމް ހިމެނެ އެވެ. މި މުބާރާތް ކުރިއަށް ގެންދާނީ 25 ޖުލައި އިން ފެށިގެން 27 ޖުލައި އާ ހަމައަށެވެ.

މި މުބާރާތުގެ ރެފްރީކަން ކުރާނީ އަޒުމް އެކަޑަމީގެ ރެފްރީން ކަމަށް މުބާރާތް އިންތިޒާމްކުރާ ފަރާތުން ބުނެއެވެ. އަޒުމް ސްޕޯޓްސް އެކަޑެމީ އަކީ ގއ. މާމެންދޫގެ ކުޑަކުދިންނަށް އެކި އެކި ކުޅިވަރު ތަމްރީނުކޮށްދިނުމުގެ މަޤްސަދުގައި ރަޖިސްޓަރީ ކޮއްގެން ކުރިޔަށް ގެންދާ ކުޅިވަރު އެކަޑެމީއެކެވެ. އެގޮތުން މި އެކަޑެމީން ވަނީ މީގެ ކުރިން ރެފްރީންވެސް ތަމްރީންކޮށްފައެވެ.

މި މުބާރާތުގެ ޗެމްޕިއަންކަން ހޯދާ ޓީމަކަށް 5000 ރ ގެ ފައިސާގެ އިނާމެއް ހުށަހަޅާފައިވާއިރު, ދެވަނައަށް ދާ ޓީމަކަށް 2000ރ ގެ ފައިސާގެ އިނާމެއް ވަނީ ހުށަހަޅާފައެވެ.