އެފްއޭމްގެ ނޯމަލައިޒޭޝަން ކޮމެޓީއަށް ފުރިހަމަ އެއްބާރުލުން ދޭނަން - ސްޕޯޓްސް ކޮމިޝަނަރު

އެފްއޭއެމް ހިންގުން ނޮމަލައިޒޭޝަން ކޮމިޓީއަކާ ހަވާލުކުރުމަށް ފީފާއިން ނިންމި ނިންމުމަށް ކޮމިޝަނަރ އޮފް ސްޕޯޓްސް މުހައްމަދު ތޮލާލް މަރުހަބާ ވިދާޅުވެއްޖެ އެވެ.

ފީފާއިން މިއަދު ވަނީ މާލީ އަދި ހިންގުމުގެ ބޮޑެތި މައްސަލަތަކެއް ކުރިމަތިވެފައި އޮތް އެފްއޭއެމް، ނޯމަލައިޒޭޝަން ކޮމިޓީއަކާ ހަވާލުކުރަން އޭޝިއާގެ ފުޓްބޯޅައިގެ މައި އިދާރާ އޭއެފްސީގެ މަޝްވަރާއާއިއެކު ނިންމާފައިވާކަން އެފްއޭމްއަށް ރަސްމީކޮށް އަންގާފައި އެވެ.

ފީފާގެ މި ނިންމުމާއި އެކު ރާއްޖޭގެ ސްޕޯޓްސް ކޮމިޝަނަރ އަދި ކުޅިވަރު އިދާރާތަކުގެ ކަންކަން ވިލަރަސްކުރުމުގެ އެންމެ އިސް ފަރާތް ކަމަށްވާ ތޮލާލް އެކްސްގައި ކުރެއްވި ޕޯސްޓެއްގައި ވިދާޅުވީ ފީފާގެ ނިންމުމަށް މަރުހަބާ ދަންނަވާ ކަމަށާއި ފީފާއިން އުފައްދާ އެފްއޭމްގެ ނޯމަލައިޒޭޝަން ކޮމެޓީއަށް ފުރިހަމައަށް އެއްބާރުން ދެއްވާނެ ކަމަށެވެ.

ފީފާއިން އައްޔަން ކުރާ ނޯމަލައިޒޭޝަން ކޮމިޓީގެ މުއްދަތުގެ ގޮތުގައި އެ ފެޑެރޭޝަނުން ދީފައި ވަނީ އެއް އަހަރު ދުވަހެވެ. ކޮމިޓީގެ ދައުރު ހަމަވާނީ އަންނަ އަހަރުގެ ޖުލައި 31 ގެ ނިޔަލަށެވެ. ފީފާ އިން ބުނީ އެ ކޮމިޓީއާ ހަވާލުވާ ޒިންމާތައް ނިމޭހާ އަވަހަކަށް ކޮމިޓީގެ ދައުރު ހަމަވާނެ ކަމަށެވެ.

"ރާއްޖެއާ ގުޅޭ ގޮތުން މިގޮތަށް ނިންމީ އޭއެފްސީއާ މަޝްވަރާކުރުމަށްފަހު އަދި އެފްއޭއެމަށް ކުރިމަތިވެފައިވާ ދޯހަޅި ހިންގުމުގެ މައްސަލަތަކުގެ އިތުރުން މާލީ ގިންޖެހުންތައް ހައްލެއް ހޯދައިދިނުމުގެ ގޮތުންނެވެ.،" ފީފާގެ ބަޔާނުގައި ބުނެފައި ވެއެވެ.

ކޮމިޓީ އަށް އައްޔަން ކުރާނީ ކޮން ބައެއް ކަމެއް އަދި މިހާތަނަށް ފީފާ އިން ނުނިންމަ އެވެ. ނަމަވެސް ކޮމެޓީއަށް އައްޔަނުކުރުމަށް ރާއްޖޭގެ ބައެއް ފުޓްބޯޅަ ތަޖުރިބާކާރުންގެ މައުލޫމާތު މިހާރު ފީފާއިން އެއްކޮށްފައިވާ ކަމަށް މައުލޫމާތު ލިބެއެވެ.

މިރޭ އެފްއޭމުން ނެރުނު ބަޔާނެއްގައި ބުނީ 2024 ވަނަ އަހަރުގެ ޖެނުއަރީ މަސް ތެރޭގައި ކުރެވުނު ފީފާގެ ފޮރެންސިކް އޯޑިޓުންނާއި، ފީފާގެ ގަވާރނަންސް އޯޑިޓް އެންޑް ކޮމްޕްލަޔަންސް ކޮމިޓީއިން ފުޓްބޯޅަ އެސޯސިއޭޝަން އޮފް މޯލްޑިވްސްގެ މައްސަލަތަކާއި ބެހޭގޮތުން ހޯދިހޯދުންތަކުގެ މަށްޗަށް ބީނާކޮށް، އެފް.އޭ.އެމް އަށް ދެމުންގެންދިޔަ ޑިވެލޮޕްމަންޓް ފަންޑު 12 މާރޗް 2024 ވަނަ ދުވަހުސަސްޕެންޑް ކުރުމަށް ނިންމާފައިވާ ނިންމުމާއި، އެފް.އޭ.އެމް ގެ ކުރީގެ ރައީސް 9 މަސް ދުވަހަށް ފުޓުބޯޅައިގެ އެންމެހާއި ޙަރަކާތްތަކުން ސަސްޕެންޑު ކުރުމަށް ފީފާގެ އެތިކްސް ކޮމިޓީއިން ނިންމަވާފައިތީއާއި، އަދި 2 ޖުލައި 2024 ވަނަ ދުވަހު އެފް.އޭ.އެމްގެ ހިންގާ ކޮމިޓީގެ ދައުރު ހަމަވެފައިވުމާއިގުޅިގެން އެ ކަންތައްތަކަށް ރިޢާޔަތްކޮށް ފުޓްބޯޅަ އެސޯސިއޭޝަން އޮފް މޯލްޑިވްސް ހިންގުމުގައި ހުރި މައްސަލަތަކާއި އަދި މިވަގުތު ދިމާވެފައިވާ މާލީ ބޮޑެތި މައްސަލަތަކާއި ގުޅިގެން، އޭ.އެފް.ސީގެ ލަފައާއި މަޝްވަރާގެމަތިން، ފީފާގެ ސްޓެޓިއުޓްސްގެ އާރޓިކަލް 8، ޕެރަގްރާފް 2 ގައި ބަޔާންކުރާ ފުޓްބޯޅަ އެސޯސިއޭޝަން ހިންގުމަށް ނޯމަލައިޒޭޝަން ކޮމެޓީއެއް އައްޔަން ކުރުމަށް 23 ޖުލައި 2024 ވަނަ ދުވަހު ފީފާގެ ބިޔުރޯއިން ވަނީ ނިންމާ އެކަން އަންގާފައި ކަމަށެވެ.

އެގޮތުން އައްޔަނުކުރެވޭ ނޯމަލައިޒޭޝަން ކޮމިޓީގެ މެންޑޭޓްގައި ހިމެނިގެންދާނީ އެފް.އޭ.އެމް އިން ދުވަހުން ދުވަހަށް ކުރާ މަސައްކަތްތަށް ކުރުމާއި، އެފް.އޭ.އެމްގެ އަސާސީ ގަވާއިދު އަދި އިލެކްޓޯރަލް ކޯޑް ފީފާގެ ސްޓެޓިއުޓްސްއާއި އެއްގޮތަށް މުރާޖާކޮށް އެ އުޞޫލުތަކާ އެއްގޮތަށް ޢަމަލުކުރާކަން ކަށަވަރުކުރުމާއި، އެފް.އޭ.އެމްގެ ގެ އިސް ވެރީންނާއި އެހެނިހެން ފަރާތްތަށް ގުޅިގެން ފީފާ އަދި އޭ.އެފް.ސީ އިން ދީފައިވާ ފައިސާ ނަހަމަގޮތުގައި ބޭނުންކޮށްފައިވާނަމަ، އެފައިސާ ހޯދުމަށް ރާއްޖޭގެ ޤާނޫނީ ނިޒާމުގެތެރޭން ކުރަންޖެހޭ ކަންކަން ކުރުމާއި، ފީފާ އިން އައްޔަން ކޮށްފައިވާ އެކްސްޓާރނަލް ފައިނޭންސަލް ކޮންސަލްޓަންޓާއި ގުޅިގެން އެފް.އޭ.އެމްގެ ދަރަނިތަށް ރީސްރަކްޗަރ ކުރުމުގެ ޕްލޭނެއް ހެދުމާއި، ފީފާގެ ފޮރެންސިކް އޯޑިޓް ރިޕޯރޓްގައި ބަޔާންކޮސްފައިވާ ކަންތައްތައް ތަންފީޒުކުރަން ފެށުމާއި، އެފްއޭއެމްގެ އެގްޒެކެޓިވް ކޮމެޓީއެއް އިންތިހާބު އާ ޤާނޫނީ އޮނިގަނޑެއްގެ މައްޗަށް ބިނާކޮށް އިންތިޒާމުކޮށް ކުރިއަށް ގެންދިޔުންކަމުގައި ފީފާ އިން އެފް.އޭ.އެމް އަށް މިއަދު އަންގާފައިވާ ކަމަށްވެސް އެފްއޭމްގެ ބަޔާނުގައި ބުނެފައި ވެއެވެ.

އަދި ފީފާއިން އަންގާފައިވަނީ މި ކޮމިޓީ އެކުލެވިގެންދާނީ ވަކިން ޚާއްޞަކޮށް ޤާނޫނީ، މާލީ އަދި ފުޓުބޯޅައާއި ގުޅުންހުރި އެކަށީގެންވާ ތަޖުރިބާ ލިބިފައިވާ މެންބަރުންގެ މައްޗަށް ކަމަށާއި، ނޯމަލައިޒޭޝަން ކޮމިޓީގައި ތިއްބަވާނެ އެކަށީގެންވާ އަދަދު ކަނޑައަޅާނީ، އަދި މެމްބަރުން އެ ކޮމިޓީއަށް އައްޔަން ކުރާނީ ފީފާ އާއި އޭއެފްސީ ގުޅިގެން ކަމަށާއި އަދި އެކޮމިޓީއަށް މީހުން އައްޔަން ކުރުމުގެ މަސައްކަތް ވީއެންމެ އަވަހަކަށް ނިންމަވާނެކަމަށް ވެސް ފީފާއިން އަންގާފައިވާ ކަމަށް އެފްއޭމުން ބުނެއެވެ.