ސްކޫލު ޗުއްޓީތަކުގައި ޓީޗަރުން ވަޒީފާ އަށް ނުނެރުމަށް ސްކޫލުތަކަށް އެޑިއުކޭޝަނުން އަންގައިފި

ސްކޫލު ޗުއްޓީތަކުގައި ޓީޗަރުން ވަޒީފާ އަށް ނުނެރުމަށް ސްކޫލުތަކަށް އެޑިއުކޭޝަން މިނިސްޓްރީއިން މިއަދު އަންގައިފި އެވެ.

ޕާމަނެންޓް ސެކެޓްރީ ޝިފާޒްގެ ސޮއާއި އެކު އެ މިނިސްޓްރީން ސްކޫލްތަކަށް މިއަދު ފޮނުވި ސާކިއުލާއެއްގައި ބުނީ، މި ދިރާސީ އަހަރުގެ ފުރަތަމަ ޓާމް ބަންދާއި ދެވަނަ ޓާމް ބަންދު އަދި މިޑްޓާމް ބަންދުގައި ޓީޗަރުން ސްކޫލުތަކަށް ނެރުމަކީ މަނާ ކަމެއް ކަމަށެވެ.

ގާފު ނޫހަށް ވަނީ މި ސާކިއުލާގެ ކޮޕީއެއް ލިބިފައި އެވެ.

މި ސާކިއުލާއާއި ގުޅޭގޮތުން އެޑިއުކޭޝަން މިނިސްޓްރީއިން އަދި މިހާތަނަށް މީޑިއާތަކަށް މައުލޫމާތު ދީފައި ނުވާއިރު ސްކޫލުތަކުން މުދައްރިސުން ލައްވާ އިތުރަށް އަދި ރަސްމީ ގަޑިތަކުގައި ނޫން ގަޑިތަކުގައި އިތުރު މަސައްކަތްތައް ކުރުމަށް ސްކޫލުތަކަށް ހާޒިރުކުރާ މައްސަލަ އަކީ ޒަމާނުއްސުރެ އޮންނަ މައްސަލަ އަކަށެވެ.

މިކަމާއި ގުޅިގެން ދާދި ފަހުން އެޑިއުކޭޝަން މިނިސްޓަރ ޑރ. އިސްމާއިލް ޝަފީއު ވަނީ ޓީޗަރުންގެ "ވޯކްލޯޑް" ކުޑަކުރުމަށް މަސައްކަތް ތަކެއް ކުރައްވާނެ ކަމަށް ވިދާޅުވެފައި އެވެ.