ބަންގާޅު ހަމަނުޖެހުން: މުޒާހަރާތައް ފަށަން މެދުވެރިވި ވަޒީފާގެ ކޯޓާގެ ނިޒާމަށް އެގައުމުގެ ސުޕްރީމު ކޯޓުން ބަދަލުގެނެސްފި

ބަންގަލަދޭޝްގެ ދަރިވަރުން ބޮޑެތި މުޒާހަރާތައް ފަށަން މެދުވެރިވި ވަޒީފާގެ ކޯޓާގެ ނިޒާމަށް އެގައުމުގެ ސުޕްރީމު ކޯޓުން ބަދަލުގެނެސްފި އެވެ.

ސަރުކާރު ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުންދާ ކޯޓާ ނިޒާމާ ދެކޮޅަށް ކޮލެޖުތަކާއި ޔުނިވަސިޓީތަކުގައި މަތީ ތަޢުލީމު ހާސިލު ކުރަމުންދާ ދަރިވަރުން މުޒާހަރާ ކުރަން ފަށާފައި ވަނީ, ކުރިން އަމަލު ކުރުން ހުއްޓައިލާފައި އޮތް ކޯޓާ ނިޒާމަށް އަމަލު ކުރަން އެ ޤައުމުގެ ދަށު ކޯޓަކުން ހުސްވި ޖޫން މަހު ސަރުކާރުގެ މައްޗަށް އަމުރު ކުރުމާ ގުޅިގެންނެވެ.

މިއާއިއެކު މިދިޔަ ހަފްތާގައި އެގައުމުގައި ފެށި މުޒާހަރާތަކާއި އެކު ދަރިވަރުންނާއި ސަލާމަތީ ބާރުތަކާއި ދެމެދު ފެށި ބޮޑެތ ހަމަނުޖެހުންތަކުގައި މިހާތަނަށް 130 މީހުން ވަނީ މަރުވެފައި އެވެ. އަދި އެގައުމުގައި އޮތީ ކާފިއު އިއުލާނުކޮށްފައި އެވެ.

އެގައުމުގެ ދާހިލީ ހަމަޖެހުން ގެއްލިފައިވާ މި ދަނޑިވަޅުގައި މިއަދު ކޯޓާ ނިޒާމުގެ ބައެއް ބައިތައް ސުޕްރީމް ކޯޓުން ބާޠިލު ކުރުމާ އެކު, ސަރުކާރުގެ ވަޒީފާތަކުގެ ތެރެއިން 93 އިންސައްތަ ވަޒީފާއަށް މީހުން ޢައްޔަން ކުރުމުގައި ދެން އިސްކަން ދޭން ޖެހޭނީ ވަޒީފާއަށް އެދި ކުރިމަތިލާ މީހުންގެ ތަޢުލީމީ ފެންވަރާއި މަސައްކަތުގެ ތަޖުރިބާއަށެވެ. އަދި ވެޓަރަންސް ދަރިކޮޅުގެ މީހުންގެ ކޯޓާ ފަސް އިންސައްތައަށް ކުޑަކޮށް ބާކީ 2 އިންސައްތަ ކަނޑައަޅާނީ ނަސްލުގެ މައިނޯރިޓީގެ މީހުންނާއި ނުކުޅެދުންތެރިކަން ހުންނަ މީހުންނަށް ކަމަށް ސުޕްރީމް ކޯޓުން ވަނީ ނިންމާފައި އެވެ.

ކުރިން އަމަލު ކުރުން ހުއްޓައިލާފައި އޮތް ކޯޓާ ނިޒާމަށް އަމަލު ކުރަން އެ ޤައުމުގެ ދަށު ކޯޓަކުން ހުސްވި ޖޫން މަހު ސަރުކާރުގެ މައްޗަށް އަމުރުކުރި އިރު އެކޯޓާގެ ނިޒާމުގައި ވާގޮތުން ނަމަ ވެޓަރެންސް ނުވަތަ އެގައުމަށް ހިދުމަތްކުރި ފަރާތްތަކުން ދަރިކޮޅަށް ލިބޭސަރުކާރު ވަޒީފާތަކުގެ 30 އިންސައްތަ ވަނީ ހާއްސަކޮށްފައެވެ. އަދި އެހެނިހެން މާއްދާތަކުގައި ވާ ބައިތަކާއި އެކު އެކި ފަރާތްތަކަށް ޚާއްޞަ ކޮށްފައިވާ ވަޒީފާތަކުގެ އިންސައްތަ 50އަށްވުރެ މައްޗަށް އުފުލިގެން ދިޔައެވެ.

މިއާއި އެކު އެގައުމުގައި ތައުލީމް ހާސިލުކުރާ ދަރިވަރުންނަށް ލިބޭ ކޯޓާ ބޮޑުތަނުން ކުޑަވެގެންގޮސް ގިނަ އަދަދެއްގެ ދަރިވަރުން ސަރުކާރުގެ އެނިންމުމާއި ދެކޮޅަށް މަގުތަކަށް ނުކުންނަށް މަޖުބޫރު ވެގެން ދިޔައެވެ.

ވެޓަރެންސް ގެ ގޮތުގައި ވަޒީފާގެ ކޯޓާތައް ސަރުކާރުން ޚާއްސަ ކުރީ 1971 ވަނަ އަހަރު ބަންގްލަދޭޝްގެ މިނިވަންކަމުގެ ހަނގުރާމައިގައި ހަނގުރާމަކުރި ފަރާތްތަކުގެ ދަރިފަސްކޮޅަށެވެ.