ރައީސް ސޯލިހާއި ރައީސް ނަޝީދު އެއް ގަލަކަށް އަރަން އެއްބަސް!

އެމްޑީޕީގެ ތެރޭގައި އުފެދުނު ކޯޅުމަކީ ވެރިކަން ގެއްލުމުގެ އެއް ސަބަބު ކަމަށާއި ގުޅިގެން މަސައްކަތްކުރައްވަން ތައްޔާރަށް ހުންނެވި ކަމަށް ކުރީގެ ރައީސް އިބްރާހިމް ސޯލިހު ވިދާޅުވެއްޖެ އެވެ.

މިއަދު ފާހަގަކުރަމުންދާ އެމްޑީޕީގެ 19 ވަނަ އަހަރީ ދުވަހާއި ދިމާކޮށް ރާއްޖެޓީވީއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ ނިމިދިޔަ ރިޔާސީ އިންތިހާބު އެމްޑީޕީ އަށް ގެއްލުނީ އެ ޕާޓީގައި ތިބި ބައެއް މެންބަރުން ޕާޓީ ދޫކޮށް ދިއުމުން ކަމަށާއި، އެ މެންބަރުން އެކަމާ މެދު ވިސްނައި މިއަދު އެކުގައި މަސައްކަތްކުރަން ޖެހޭ ކަމަށެވެ.

ސޯލިހް ވިދާޅުވީ އެމަނިކުފާނާއި ދޭތެރޭ ހުރި ޒާތީ މައްސަލަތަކެއް ކަމަށްވިޔަސް އަދި ޕާޓީ ތެރޭގައި ހުރި މައްސަލަތައް ކަމަށްވި ނަމަވެސް އެ މައްސަލަތައް އެއްފަރާތްކުރުމަށްފަހު އެމްޑީޕީ އުފެއްދި ސަބަބަށް ވާސިލުވުމަށް ކުރަން ޖެހޭ މަސައްކަތްތައް ކުރުމަށްޓަކައި އެމެމްބަރުން ޕާޓީއަށް އަނބުރާ އައުން މުހިންމު ކަމަށެވެ. އަދި އެމްޑީޕީ ދޫކުރައްވައި ވަޑައިގެންނެވި މެންބަރުން އަނބުރާ އެމްޑީޕީ އަށް ވަޑައިގަތުމަށް ސޯލިހް ވަނީ ގޮވާލައްވާފައި އެވެ.

"ގައުމަށާއި އަދި އަޅުގަނޑުމެން މިކުރި މަސައްކަތް، އަދި ނިމުމަކަށް ނުދޭ، އަޅުގަނޑުމެން އެ ދުވަހު ފެށި މަސައްކަތް ނިމުމަކަށް ނާދޭ،" އެމަނިކުފާނު ވިދާޅުވިއެވެ.

އެމްޑީޕީ އާ މެދު ރައްޔިތުންގެ އުންމީދެއް އަދިވެސް އޮތްކަމަށާއި، އެކުގައި ތިބެވިއްޖެ ނަމަ، ދެން އަންނަ ދައުރެއްގައި ވެރިކަމަށް އާދެވޭނެ ކަމުގެ ޔަގީންކަން އެބައޮތް ކަމަށް ވެސް ސޯލިހު ވިދާޅުވިއެވެ.

ސޯލިހުގެ މިވާހަކަފުޅު އެކްސްގައި ހިއްސާކުރައްވާ އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވީ ސޯލިހުގެ ބަސްފުޅަށް އެއްބަސްވެވަޑައިގަންނަވާކަކަމަށެވެ. އަދި ސޯލިހް ވިދާޅުވި މިސްރާބު އެމަނިކުފާނުގެ ޓީމަށްވެސް ހޯދޭނެ ކަމުގެ އުންމީދު ކުރައްވާ ކަމަށް ނަޝީދު ވިދާލުވިއެވެ.

އެމްޑީޕީ ތެރޭގައި ކޯޅުން އެންމެ ފުރަތަމަ އުފެދުނީ އެޕާޓީގެ ޗެއާޕާސަންގެ އިންތިހާބުގެ ތެރޭގައި އެވެ. އެގޮތުން ރައީސް ނަޝީދުގެ ފަރާތުންވެސް ކެނޑިޑޭޓެއް ނެރުއްވި އިރު ކާމިޔާބުވީ ރައީސް ސޯލިހްގެ ކެނޑިޑޭޓަށެވެ. އަދި އެޔަށްފަހު ރިޔާސީ ޕްރައިމެރީގައި ނަޝީދަށް ނާކާމިޔާބު ވެވަޑައިގަތުމާއި އެކު ޕާޓީގެ ދެ ފެކްޝަން އުފެދިގެން ދިޔައެވެ. އަދި ނަޝީދުގެ ފެކްޝަންގައި ހިމެނިވަޑައިގަންނަވާ އަލީ އާޒިމް ސުލޫކީ މައްސަލަތަކާއި ހެދި ޕާޓީން ވަކިކުރުމާއި އެކު ނަޝީދުގެ ފެކްޝަންގައި ހިމެނިވަޑައިގެންވެި ފަރާތްތަކުންވެސް އެމްޑީޕީއިން އިސްތިއުފާ ދެއްވާ ޑޮމޮކްރެޓްސްގެ ނަމުގައި އައުޕާޓީއެއް އުފެެއްދެވިއެވެ. އަދި ރިޔާސީ އިންތިހާބުގައި ވަކިން އެޕާޓީއިން ވާދަކުރި އިރު ވޯޓުގެ ފަރަގުން ނަމަ ތިން ވަނަ އެޕާޓީއަށް ލިބިގެންދިޔައެވެ. ހިސާބުތަކަށް ބަލާނަމަ އެމްޑީޕީއާއި ޑިމޮކްރެޓްސް އެކުގައި އިންތިހާބުގައި ވާދަކުރި ނަމަ އިންތިހާބު ކާމިޔާބުވުމުގެ ފުރުސަތު އޭރު އެމްޑީޕީއަށް އޮތެވެ.