މަސްވެރިންނަށް ފައިސާ ދިނުން އަވަސްކުރުމަށް ގޮވާލައި އިދިކޮޅުން ކުއްލި މައްސަލައެއް ހުށަހަޅައިފި

މަސްވެރިންނަށް ނުދެވި ހުރި ފައިސާ ދިނުން އަވަސްކުރުމަށް ގޮވާލައި އިދިކޮޅު އެމްޑީޕީން ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފި އެވެ.

މަރަދޫ ދާއިރާގެ މެމްބަރު އަހުމަދު ދީދީ ހުށަހެޅުއްވި މި މައްސަލައިގައި ވިދާޅުވީ، މަސް ކިރާތާ 48 ގަޑިއިރުތެރޭ މަހަށްވާ ފައިސާ ދޫކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ނަމަވެސް، ފާއިތުވި ދެ މަސް ދުވަހު މަސްވެރިންނަށް ދޭން ޖެހޭ ފައިސާ ދީފައިނުވާ ކަމަށެވެ.

މަސްވެރިންނަށް ފައިސާ ނުލިބުމުގެ ސަބަބުން, މަސްވެރި އާއިލާތަކުން ބިލްތައް ނުދެއްކި އާއިލާތައް ހާލުގައި ޖެހިފައިވާ ކަމަށް މި މައްސަލަ ހުށަހަޅުއްވަމުން އޭނޭ ވިދާޅުވި އެވެ. އެހެންކަމުން މަސްވެރިންނަށް ނުދެވި ހުރި ފައިސާ ވީހާވެސް އަވަހަކަށް މަސްވެރިންނަށް ދިނުމަށް މި މައްސަލާގައި ވަނީ ސަރުކާރަށް ގޮވާލާފައެވެ.

ހުކުރު ދުވަހުން ފެށިގެން އައްޑޫ ސިޓީގައި މަސްވެރިން އަންނަނީ މުޒާހަރާ ކުރަމުންނެވެ. އެމީހުން އަޑު އުފުލަމުން އަންނަނީ, ފާއިތުވި ދެ މަހާއި 17 ދުވަހު ކިރުވި މަހަށް ލިބެންވާ ފައިސާ ނުލިބިގެންނެވެ. މިފައިސާ ނުލިބެނީސް މުޒާހަރާ ނުހުއްޓާނެކަމަށް މަސްވެރިން ވަނީ ބުނެފައެވެ.