ރާއްޖެ ހިމެނޭ ސަރަހައްދަށް ވޯލްޑް ބޭންކުން އާ ކަންޓްރީ ޑިރެކްޓަރެއް

ރާއްޖެ އާއި ނޭޕާލް އާއި ސްރީލަންކާ ހިމެނޭ ސަރަހައްދުގެ ވޯލްޑް ބޭންކުގެ އާ ކަންޓްރީ ޑިރެކްޓަރަކަށް ޑޭވިޑް ސިސްލެން ހަމަޖައްސައިފި އެވެ.

ވޯލްޑް ބޭންކުން ބުނެފައިވަނީ, ސިސްލެން މި މަގާމާ ހަވާލުވާނީ އަންނަ މަހުގެ 1 އިން ފެށިގެން ކަމަށެވެ. މިހާރު އެ މަގާމުގައި ހިންނެވި ފާރިސް ހަދާދު ޒާރްވޮސް ވޯލްޑް ބޭންކުގެ އެހެން މަގާމަކަށް ވަޑައިގަތުމަށް ހަމަޖެހިފައިވާ ކަމަށް އެ ބަޔާނުގައިވެއެވެ.

އެމެރިކާ އާއި އިޓަލީ ޕާސްޕޯޓު އޮންނަ ސިސްލެން ވޯލްޑް ބޭންކާ ގުޅުނީ 2001 ގައި، އެ ބޭންކުގެ އާބަން ކްލަސްޓާ ޔުނިޓުގެ އިކޮނޮމިސްޓަކަށެވެ. އެއަށް ފަހު އޭނާ ވަނީ އެކި ސަރަހައްދުތަކުގައި ވޯލްޑް ބޭންކުގެ އޮޕަރޭޝަނަލް އަދި މެނޭޖީރިއަލް މަގާމުތައް ފުރުއްވާފަ އެވެ.

ސިސްލެން އެންމެ ފަހުން މަސައްކަތްކުރެއްވީ, ލެޓިން އެެމެރިކާ އަދި ކެރީބިއަން ސަރަހައްދުގެ އާބަން، ޑިޒާސްޓާ ރިސްކް މެނޭޖްމަންޓް އެންޑް ލޭންޑުގެ ޕްރެކްޓިސް މެނޭޖަރެއްގެ މަގާމުގައެވެ.

މަގާމު ލިބުމާ ގުޅިގެން ސިސްލެން ވިދާޅުވީ ވަރަށް އަވަރަށް ސްޓޭކްހޯލްޑްރުންނާއި ބައިވެރިންނާ ބައްދަލުކުރައްވާނެ ކަމަށެވެ.

ސިސްލެން ހަވާލުވާ، ރާއްޖެ، ސްރީލަންކާ އަދި ނޭޕާލްގެ ވޯލްޑް ބޭންކުގެ ޕޯޓފޯލިއޯ އަގުކުރެވިފައިވަނީ 4.8 ބިލިއަން ޑޮލަރުގައެވެ.