
-
"ފަލަސްތީނާ އެކު ދިވެހިން" ނަމުގައި ޕީއެސްއެމް އިން ކުރިއަށް ގެންދާ ޓެލެތޯންއަށް ފައިސާ ޖަމާކުރެވޭ ވަގުތު އިތުރުކޮށްފި އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމުގެ މަތީން ފަލަސްތީނަސް އެހީވުމަށް ގައުމީ ޓެލެތޯން އެއް ފެށީ އިއްޔެ ހެނދުނު 8:00 ގައެވެ. މި ޓެލެތޯން ރޭ 12:00 އަށް ނިންމާލާގޮތަށް އޮތް ނަމަވެސް މިހާރުވަނީ މިއަދު ހަވީރު 6:00 އާ ހަމައަށް ފައިސާ ފޮނުވުމުގެ ވަގުތު އިތުރުކޮށްފައެވެ.
ރޭ 12:00 އާ ހަމައަށް މި ޓެލެތޯން ފަންޑަށް ޖުމްލަ 13 މިލިއަނަށްވުރެ ގިނަ ރުފިޔާ ލިބިފައިވާ ކަމަށް ޕީއެސްއެމް އިން ވަނީ ބުނެފައެވެ. އަދި 33,000އަށްވުރެ ގިނަ ޑޮލަރު ވަނީ ލިބިފައެވެ.
މި ޓެލެތޯނަށް ހާއްސަ ދެ އެކައުންޓް އެކައުންޓް ނަމްބަރަށް ފައިސާ ވެސް ޓްރާންސްފާ ކުރެވޭނެ އެވެ. އެގޮތުން ރުފިޔާ އާއި ޑޮލަރުން ވެސް ފައިސާ ހަދިޔާކުރެވޭނެ އެވެ. ރުފިޔާ އިން ޖަމާކުރާނީ 7730000655865 އެކައުންޓަށެވެ. އަދި ޑޮލަރުން ނަމަ މި 7730000655866 އެކައުންޓަށެވެ.
މި ޓެލެތޯންއަށް ސަރުކާރު ކުންފުނިތަކުންނާއި, އެކި މުވައްސާސަތަކުގެ އިތުރުން އާއްމުންގެ ގިނަ ބަޔަކު ވަނީ ފައިސާ ހަދިޔާކޮށްފައެވެ. މި ޓެލެތޯނުން ލިބޭ ހުރިހާ ފައިސާއެއް ފަލަސްޠީނަށް ދިނުމަށް ހަމަޖެހިފައިވަނީ ދިވެހި ޚާރިޖީ ވުޒާރާ މެދުވެރިކޮށް ފަލަސްޠީނަށް އެހީވުމަށް އުފައްދާފައިވާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް "އަންރުވާ" މެދުވެރިކޮށެވެ.






