ހައްޖު ކިއުއަށް އެއްވެސް ފަރާތެއްގެ ނުފޫޒެއް ނުފޯރާނެ - ޝަކީލް

ހައްޖު ކިއުއަށް އެއްވެސް ފަރާތެއްގެ ނުފޫޒެއް ނުފޯރާނެ ކަމުގެ ޔަގީންކަން ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ދެއްވައިފި އެވެ.

ޝަކީލް މިފަދައިން ހާމަކުރައްވާފައިމިވަނީ ހައްޖު ކޯޕަރޭޝަންގެ ހައްޖު ކިއުއަށް ނުފޯޒުފޯރުވާފައިވާ ކަމަށް ބުނެ ގިނަ ބަޔަކު ހައްޖު ކޯޕަރޭޝަނަށާއި އިސްލާމީ ކަންތައްތަކާއި ބެހޭ ވުޒާރާއަށް ބޮޑު ތުހުމަތު ތަކެއް ކުރަމުން އަންނަ ދަނޑިވަޅެއްގައި އެވެ.

މިރޭ އެކްސްގައި ކުރެއްވި ޕޯސްޓެއްގައި ޝަކީލް ވިދާޅުވީ ހައްޖު ކޯޕަރޭޝަންގެ ހައްޖު ކިއުގެ ނިޒާމް ހަމަޖެހިފައިވާ ގޮތުން އެއްވެސް ފަރާތެއްގެ ނުފޫޒެއް ހައްޖު ކިއު އަކަށް ނުފޯރުވޭނެ ކަމަށެވެ.

މިއާއި އެކު ޝަކީލް ވަނީ މިއަހަރުގެ ހައްޖާޖީންނާއި ގުޅޭ މައުލޫމާތުވެސް ހާމަކުރައްވާފައި އެވެ. އެގޮތުން ޝަކީލް ވިދާޅުވީ 1445 ވަނަ އަހަރު ހައްޖަށް ދެވޭނެ ކަމަށް ހައްޖު ކޯޕަރޭޝަންގެ ކިއުގައިވާ ހުރިހާ ފަރާތްތަކަށް ހައްޖަށް ދިއުމުގެ ފުރުސަތުވަނީ ދެވިފައިވާ ކަމަށާއި އަދި 1445 ވަނަ އަހަރުގެ ރަސްމީ 1000 ކޯޓާއިން ހައްޖު ކޯޕަރޭޝަންގެ ހަވާލުގައި ހައްޖަށް ދިއުމަށް ހަމަޖެހިފައިވާ މީހުންގެ ތެރެއިން އެހީތެރިންގެ ގޮތުގައި އަންނަ ހައްޖު ކޯޕަރޭޝަންގެ 3 މުވައްޒަފުން ފިޔަވާ ހުރިހާ ހައްޖުވެރިން މައްކާއަށް އައިސް އުމްރާގެ އަޅުކަން ފުރިހަމަކޮށްފައިވާ ކަމަށެވެ.

ހައްޖު ކިއުއާއި ގުޅޭ ތުހުމަތުތަކެއް ފެންމަތިވުމާއި އެކު އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު މިއަދު ވަނީ ހައްޖު ކިއުއަށް ނުފޫޒު ފޯރުވާފައިނުވާނެ ކަމަށާއި ޒަމާނުއްސުރެންވެސް ރާއްޖޭގެ ސަރުކާރުގެ ބޭނުމަށް ޖާގަތަކެއް ޚާއްސަކޮށްފައި ހުންނަ ކަމަށާއި ހައްޖު ކޯޕަރޭޝަން އުފެއްދުމުގެ ކުރިން ވެސް އެކަން އޮތީ އެހެން ކަމަށް ވިދާޅުވެފައިއެވެ. އަދި މިހާރު މިއީ މުޅިން އަލަށް ސީދާ އެއްހާހަށްވުރެން ގިނަ މީހުންނަށް ކިޔު އިން ޖާގަ ލިބުނު އަހަރު ކަމަށާއި އެހެން ނޫނީ ކިޔު އިން ޖާގަ ލިބެނީ 700 އެއްހާ މީހުންނަށް ކަމަށް ވިދާޅުވިއެވެ.

މިއަހަރު ރާއްޖެއިން 1150 މީހުން ހައްޖަށް ދާނެކަން ފާހަގަކުރައްވައި ޝަހީމް ވިދާޅުވީ, މިއީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކުރެވުނު ބުރަ މަސައްކަތްތަކުގެ ނަތީޖާ ކަމަށެވެ.

2022 ވަނަ އަހަރު ރާއްޖެއިން ހައްޖަށް ދެވުނީ 400 މީހުންކަން ފާހަގަކުރައްވައި ޝަހީމް ވިދާޅުވީ, އޭގެ ކުރީގެ ދެ އަހަރު ކޯވިޑް-19 އާއި ގުޅިގެން ހައްޖަށް މީހުން ނުދާ ކަމަށެވެ. މީގެ ސަބަބުން ރާއްޖޭގެ ހައްޖު ކިއޫ ދިގުވެފައިވާކަމަށް ޝަހީމް ވިދާޅުވި އެވެ. އަދި އެ ހަޤީޤަތް ޤަބޫލުނުކޮށް މުއައްސަސާތަކުގެ އަގު ވައްޓާލުމަކީ ދެރަ ކަމެއް ކަމަށްވެސް ޝަހީމް ވިދާޅުވި އެވެ.

ރާއްޖޭގައި އޮންނަނީ އިސްލާމީ ދުނިޔޭގެ ހައްޖު އިދާރާގެ ތެރެއިން ފާހަގަކޮށްލެވޭ ރަނގަޅު އިދާރާއެއް ކަމަށާއި ހައްޖު ކޯޕަރޭޝަނާމެދު ދިވެހިން އުފާވާން ޖެހޭ ކަމަށް ވެސް ޝަހީމް ވިދާޅުވިއެވެ.

ކޮންމެ މީހަކު ވެސް ފައިސާ ދެއްކުމުން ޖާގަ ކަށަވަރުވެ ހައްޖަށް ދެވޭ އަހަރު ކަށަވަރުވާ ކަމަށް ޝަހީމް ވިދާޅުވި އެވެ. ބައެއް ޤައުމުތަކުގައި ހައްޖަށްދާ އެންމެން ހޮވަނީ ގުރުއަތުން ކަމަށާއި އެއްވެސް މީހަކަށް ދެވޭނެ ކަމުގެ ޔަޤީންކަން ނޯންނަ ކަމަށް ވެސް ވިދާޅުވިއެވެ.

ފަރުޟު ހައްޖު ކުރަން ބޭނުންވާ މީހުންނަށް އިސްކަން ދެވޭނެ ކަމަށާއި ސައުދީއަރަބިއްޔާގައި އޮންނަ ގޮތަށް ހައްޖު ކޮށްފައި ހުންނަ މީހަކަށް 5 އަހަރު ފަހުން ނޫނީ ނުދެވޭ ގޮތަށް ހެދުމަކީ ވެސް ބައެއް ޤައުމުތަކުން ކުރާ ކަމެއް ކަމަށް ޝަހީމް ވިދާޅުވިއެވެ. އަދި އެހެން ހަދަނީ ފަރުޟު ހައްޖު ކުރަން ގިނަ މީހުންނަށް ފުރުސަތު ދިނުމަށް ކަމަށް ވަނީ ފާހަގަކުރައްވާފައެވެ.