ފަލަސްތީނަށް އެހީވުމަށްޓަކައި ރައީސްގެ ޚާއްސަ އެދިވަޑައިގަތުމަކަށް ޓެލެތޯންއެއް ބާއްވަނީ

ޔަހޫދީން ހުއްޓުމެއް ނެތި ދެމުން އަންނަ ހަމަލާތަކުގައި ސުންނާފަތިވެފައިވާ ފަލަސްތީނަށް އެހީވުމަށް ރައީސް ޑރ މުހައްމަދު މުއިއްޒުގެ ޚާއްސަ އެދިވަޑައިގަތުމަށް ޓެލެތޯންއެއް ބޭއްވުމަށް ދައުލަތުގެ މީޑިއާ, ޕަބްލިކް ސާވިސް މިޑިއާއިން ނިންމައިފި އެވެ.

ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު މިރޭ ވިދާޅުވީ ފަލަސްޠީނުގައި ހާލުގައި ޖެހިފައިވާ މީހުންނަށް އެހީތެރިވުމަށް ޓެލެތޯން ކުރިއަށްގެންދާނީ ރައީސް މުއިއްޒުގެ ހާއްސަ އެދިވަޑައިގަތުމަކަށް އިޖުތިމާޢީ ބޮޑު ހަރަކާތެއްގެ ގޮތުގައި ކަމަށާއި މި ހަރަކާތް ކުރިޔަށް ގެންދިޔުމަށް ހަމަޖެހިފައިވަނީ އަންނަ މަހުގެ 12 ވަނަ ދުވަހު ކަމަށެވެ. ޕީއެސްއެމްއިން ކުރިޔަށް ގެންދާ މި ޓެލެތޯން ކުރިޔަށް ގެންދިޔުމަށް ހަމަޖެހިފައިވަނީ ރާއްޖޭގެ އެހެން ނޫސްތަކާއި ޓީވީތަކާއި ގުޅިގެން ކަމަށްވެސް ޒީނާ ވަނީ ވިދާޅުވިއެވެ.

ޒީނާ އިތުރަށް ވިދާޅުވީ ޓެލެތޯންގައި އެހީތެރިކަން ފޯރުކޮށްދިނުމަށް ބޭނުންވާ މީހުންނަށް އެފުރުޞަތު އޮންނާނެ ކަމަށާއި ރަށްރަށުގެ ކައުންސިލްތަކާއި ކުންފުނިތަކަށްވެސް ބައިވެރިވުމުގެ ފުރުސަތު އޮންނާނެ ކަމަށެވެ. އެގޮތުން ޓެލެތޯނާ ގުޅޭ މަޢުލޫމާތު އަށް އީމެއިލް ކުރުމުން ލިބޭނެ އިންތިޒާމު ވަނީ ހަމަޖައްސާފައި ކަމަށް ޕީއެސްއެމްއިން ބުނެއެވެ.

މި ޓެލެތޯންގެ ފަންޑު ފޮށި މާލެ ސަރަހައްދުގެ އޮފީސްތަކާއި ސްކޫލުތައް ކައިރީގައި އަދި ޕާކުތަކާއި މީހުން ގިނައިން އެއްވެއުޅޭ ސަރަހައްދުތަކުގައި ބެހެއްޓުމަށް ޕީއެސްއެމްއިން ވަނީ ނިންމާފައި އެވެ.

ޓެލެތޯން ކުރިޔަށް ގެންދިޔުމަށް ހަމަޖެހިފައިވަނީ ހެނދުނު 8އިން ރޭގަނޑު 12:00އަށެވެ. އެގޮތުން ޓެލެތޯންގެ ޚާއްސަ ކަވަރޭޖް ޕީއެްސްއެމްގެ ނެޓްވޯކުގައި ހިމެނޭ ޕީއެސްއެމް ނިއުސް އާއި ޓިވީ މޯލްޑީވްސް އަދި ދިވެހި ރާއްޖޭގެ އަޑުން ވަގުތުން ދެއްކުމަށް ވަނީ ހަމަޖެހިފައި އެވެ. އަދި މި ޓެލެތޯންއާއި ގޫޅޭ އެހެނިހެން ޓީވީ ތަކާއި ނޫސްތަކުންވެސް ކަވަރޭޖް ގެނައުމުގެ ފުރުސަތު އޮންނާނެ ކަމަށް ޕީއެސްއެމުން ބުނެއެވެ.

ޕީއެސްއެމްއާއި ރާއްޖޭގެ މީޑިއާތައް ގުޅިގެން މީގެ ކުރިންވެސް ވަނީ ޚާއްސަ ޓެލެތޯންއެއް ކުރިޔަށް ގެންގޮސްފައި އެވެ. އެގޮތުން އެޓެލެތީނު ކުރިޔަށްދަނީ އިންޓަނޭޝަނަލް އެއިޑް ކެމްޕޭން (އައިއޭސީ) އާއި ރާއްޖޭގެ މީޑިއާތައް ގުޅިގެންނެވެ. އެޓެލެތޯނުގައި ފަލަސްތީނަށް އެހީވުމަށްޓަކައި 12 މިލިއަން ރުފިޔާ ވަނީ ހޯދާފައި އެވެ.