ރަސްމާލެ މަޝްރޫއު މިވަގުތު އޮތީ މަޑުޖެހިފައި, ނަމަވެސް މިއަހަރުގެ ނިޔަލަށް ހިއްކާ ނިންމާނެ!

ރައީސް ޑރ މުހައްމަދު މުއިއްޒުގެ ސަރުކާރުގެ އެންމެ ބޮޑު އެއް މަޝްރޫއު ކަމަށްވާ ރަސްމާލެ މަޝްރޫއަށް ފުށިދިއްގަރުފަޅު ހިއްކުން މިވަގުތު މަޑުޖެހިފައިވާ ކަމަށް އިންފްރާސްޓްރަކްޗަރ މިނިސްޓްރީއިން ހާމަކޮށްފި އެވެ.

އެމިނިސްޓްރީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ރ.ޢަބްދުﷲ މުއްޠަލިބު ވިދާޅުވީ ރަސްމާލެ މަޝްރޫއުއަށް ފުށިދިއްގަރު ފަަޅު ހިއްކުމުގެ މަސައްކަތް މެދުކެނޑިފައިވަނީ މަސައްކަތުގެ ކޮންޓްރެކްޓަރަށް ދިމާވި މައްސަލަ އަކާއި ގުޅިގެން ކަމަށެވެ. މި މަސައްކަތް ސަރުކާރުން ހަވާލުކޮށްފައިވަނީ ރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާއި އެވެ.

މިނިސްޓަރ ވިދާޅުވީ އެ މަޝްރޫއަކީ ސަރުކާރުން ސީދާ ފައިސާގެ މުއާމަލާތެއް ހިންގުމެއް ނެތި، ކޮންޓްރެކްޓަރުން ފައިސާ ރެއިޒްކޮށްގެން ކުރިއަށް ގެންދަން ހަވާލުކުރި މަޝްރޫއުއެއް ކަމަށްވުމާއި އެކު މަސައްކަތް މެދުކެނޑިފައިވަނީ މަޝްރޫއަށް ބޭނުންވާ ފައިސާ، ސީއެމްސީއަށް ހޯދިފައި ނުވުމުންކަމަށެވެ.

މިއާއި އެކު މިހާރު ޤާއިމުކޮށްފައިވާ ކޮންޓްރެކްޓް އުވާލާ، މަޝްރޫޢު އަވަސްކުރުމަށް ގެންނަޖެހޭ ބަދަލުތައް ގެނައުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ކުރަމުންދާކަން މިނިސްޓަރ ހާމަކުރެއްވި އެވެ.

މިނިސްޓަރ އިތުރަށް ވިދާޅުވީ މަސައްކަތް އަލުން ފެށުމަށްޓަކައި ވަމުންދާ ތައްޔީރާތަކާއި އެކު މަސައްކަތް ފެށި މިއަހަރުގެ ނިޔަލަށް ރަސްމާލެ ހިއްކުމުގެ މަސައްކަތް އެއްކޮށް ނިމިގެންދާނެ ކަމަށެވެ. އަދި ބިން ހިއްކާ ނިމި، ރަސްމާލެއަށް ބޭނުންވާ އަސަސީ ޚިދުމަތްތައްކަމަށްވާ ފެނާ ނަރުދަމާއާއި މަގުހެދުމާ އަދި ކަރަންޓުގެ ޚިދުމަތް ޤާއިމުކުރުމާ ގުޅޭ މަސައްކަތްތައްވެސް މިއަހަރުގެ ތެރޭގައި ފެށުމަކީ ސަރުކާރު އަމާޒެއްކަން މިނިސްޓަރ ފާހަގަކުރެއްވި އެވެ.

ނޫސްވެރިންގެ ބައްދަލުވުމަށްފަހު އެކްސްގައި މިއަދު މިނިސްޓަރ ކުރެއްވި ޕޯސްޓެއްގައި ވިދާޅުވީ ރަސްމާލެ ހިއްކުމުގެ މަސައްކަތް އެއްބަސްވުމާ އެއްގޮތަށް ކޮންޓްރެކްޓަރަށް ނުކުރެވުމުން، އިތުރު ފުރުޞަތު ނުދޭން ނިންމި މައިގަނޑު ސަބަބަކީ މާލެ ސަރަޙައްދުން ބިންތަކެއް ދިނުމަކާނުލައި ކޮންޓްރެކްޓަރުން މެދުވެރިވެގެން ފައިނޭންސް ހަމަޖައްސައިގެން ޕްރޮޖެކްޓް ކުރިއަށް ގެންދިއުމަށް ސަރުކާރުން ބޭނުންވާތީ ކަމަށެވެ.

ރަސްމާލޭގެ ނަމުގައި ފުށިދިއްގަރުފަޅު ތަރައްގީކުރަން ނިންމައި ސީއެމްސީއާ ގުޅިގެން އެ ތަން ހިއްކަން ފެށީ 18 ޑިސެމްބަރުގަ އެވެ. ނަމަވެސް 10 ވަރަކަށް ހެކްޓަރުގެ ބިން ހިއްކުމަށްފަހު މަޝްރޫއު މަޑުޖެހުނެވެ. މިކަމާއި ގުޅިގެން ގިނަ ބަޔަކު ސަރުކާރަށް ފާޑުކިޔުން އަމާޒުކުރި ނަމަވެސް މީގެ ކުރިން ސަރުކާރުން ބުނަމުން ދިޔައީ މަޝްރޫއު ހުއްޓާނުލާ ކަމަށެވެ. ނަމަވެސް މަޝްރޫއުއަށް ދިމާވެފައިވާ މައްސަލަތައް ތަފްސީލުކޮށް މީޑިއާތަކާއި ހިއްސާކުރީ މިއަދު އެވެ.