މަސްވެރިންނަށް މިހާތަނަށް 881 މިލިއަން ރުފިޔާ ދޫކޮށްފި

މަސްވެރިންގެ އަތުން ސަރުކާރުގެ މަސްކުންފުނި މިފްކޯއިން ގަތް މަހަށްވާ ފައިސާގެ ތެރެއިން މިހާތަނަށް 881 މިލިއަން ރުފިޔާ މަސްވެރިންނަށް ދޫކޮށްފި އެވެ.

މިކަން ހާމަކުރައްވައި މިއަދު ބޭއްވި ނޫސްވެރިންގެ ބައްދަލުވުމެއްގައި ފިޝަރީޒް މިނިސްޓަރ އަހުމަދު ޝިޔާމް ވިދާޅުވީ ސަރުކާރުން މިދިޔަ އެޕްރީލް މަހުގެ 22 ގެ ނިޔަލަށް މަސްވެރިންނަށް 881 މިލިއަން ރުފިޔާ ދޫކޮށްފައިވާ ކަމަށާއި މިދިޔަ މަހުގެ 23 އިން ފެށިގެން މިއަދާއި ހަމައަށް މަސްވެރިންނަށް ދޭންޖެހޭ 62 މިލިއަން ރުފިޔާ ނުދެވި އެބައޮތް ކަމަށެވެ.

ސަރުކާރުން މަސައްކަތް ކުރަނީ މަސްވެރިންނަށް ދޭންޖެހޭ ފައިސާ ވީހާވެސް އަވަހަކަށް ދިނުމަށް ކަން ފާހަގަކުރައްވައި މިނިސްޓަރ ވިދާޅުވީ ތެލަށް މިފްކޯއިން ކުރާ ޚަރަދު ކުޑަކުރެވިގެން ނޫނީ މިފްކޯގެ ޚަރަދު ކުޑަ ނުކުރެވޭނެތީ އެ ކަމަށް ވަރަށް ބޮޑަށް މަސައްކަތް ކުރަމުންދާ ކަމަށެވެ. މިކަމަށްޓަކައި މިފްކޯގެ ފެކްޓަރީތަކަށް ބޭނުންވާ ހަކަތައިގެ 35 އިންސައްތަ އިޔާދަ ކުރަނިވި ހަކަތައަށް ބަދަލުކުރުމަށް ނިންމައި އެމަސައްކަތް ކުރުމަށް ވޯލްޑް ބޭންކުގެ އެހީތެރިކަން ހޯދުމަށް މަސައްކަތް ކުރަމުންދާކަންވެސް މިނިސްޓަރ ފާހަގަކުރެއްވި އެވެ.

ސަރުކާރުން ބުނާގޮތުގައި މަސްވެރިންނަށް ދޭން ޖެހޭ ފައިސާ ނުެދެވި ލަސްތަކެއް ދިމާވެފައިވަނީ ސަރުކާރާއި ހަވާލުވިއިރު ކުރީ ސަރުކާރުން މަސްވެރިންނަށް ނުދީ ހުރި ބިލްތަކުގެ ބޮޑު ބެކްލޮގެއް އޮތުމުންނެވެ. އެގޮތުން 250 މިލިއަނަށްވުރެ ގިނަ ފައިސާ މަސްވެރިންނަށް އޭރު ދޫނުކޮށް ހުރުމުގެ ސަބަބުން ސަރުކާރުން ފުރަތަމަ މަސައްކަތްކުރީ އެފައިސާ ހަލާސްކުރުމަށެވެ. އެމަސައްކަތް ސަރުކަރުން މިދިޔަ މާޗު މަހުގެ ތެރޭގައި ފުރިހަމަކޮށް ބެގްލޮގުގައި މިހާރު ކުރި ފައިސާތައް ދިނުމަށް އަންނަނީ މަސައްކަތްތައް ކުރަމުންނެވެ.