އެމްއެމްޕީއާރްސީގެ ޗެއާޕާސަން ނޫރައިން, އެ މަގާމުން ކުއްލިގޮތަކަށް އިސްތިއުފާ ދެއްވައިފި!

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ޗެއާޕާސަންގެ މަގާމުގައި ހުންނެވި އައިޝަތު ނޫރައިން ޖަނާހް އެ މަގާމުން ކުއްލި ގޮތަކަށް އިސްތިއުފާދެއްވައިފިއެވެ.

ނޫރައިން އެ މަގާމުން އިސްތިއުފާދެއްވި ސަބަބެއް އަދި އެނގިފައިނުވާއިރު، ނޫރައިން އެ މަގާމުން އިސްތިއުފާދެއްވިކަން "ގާފު" އަށް ވަނީ ކަށަވަރުވެފައެވެ.

ނޫރައިން އެ މަގާމުން އިސްތިއުފާ ދެއްވައިފައިވަނީ އެ މަގާމަށް އައްޔަނުކުރެއްވުނުތާ ގާތްގަޑަކަށް ފަސް މަސް މަހުންނެވެ. އެގޮތުން ނޫރައިން އެ މަގާމަށް އައްޔަނުކުރައްވާފައިވަނީ މިދިޔަ އަހަރުގެ ޑިސެމްބަރު މަހުގެ 27 ވަނަ ދުވަހުއެވެ.

ނޫރައިން އެ މަގާމުން އިސްތިއުފާދެއްވިއިރު، ސަރުކާރުގެ ކެބިނެޓުގެ ބައެއް މަގާމުތަކަށް ބަދަލުތަކެއް އައުމުގެ ވާހަކަތަކާއެކު، ފަތުރުވެރިކަމާ ބެހޭ ވަޒީރުކަމުގެ މަގާމަށް ނޫރައިން އައްޔަނުކުރެއްވުމާ ގުޅޭ ވާހަކަތަކެއް މީސް މީޑިޔާގައި ވެސް ވަނީ ދައުރުވާން ފަށާފައެވެ. އެހެން ނަމަވެސް އެކަމާ ގުޅޭ ގޮތުން ސަރުކާރުން އަދި ރަސްމީކޮށް ބަހެއް ބުނެފައެއް ނުވާއިިރު، ފަތުުރުވެރިކަމާ ބެހޭ ވަޒީރު އިބްރާހިމް ފައިސަލް ވެސް އެ މަގާމުން ވަކިކުރައްވާފައެއް ނުވެއެވެ.

އެހެން ނަމަވެސް ވަޒީރު ފައިސަލް އިނގިރޭސިބަހުން މުޚާތަބުކުރުމުގައި ދިމާވާ ދަތިތަކާ ގުޅުވައިގެން މީސް މީޑިޔާގައި ވަޒީރަށް ގިނަ ފާޑުކިިޔުންތަކެއް އަމާޒުވެ، ވަޒީރު އެ މަގާމުން ވަކިކޮށްފާނެ ކަމުގެ ވާހަކަތަކެއް މީސް މީޑިޔާގައި ވަނީ ދައުުރުވާން ފަށާފައެވެ.