ރާއްޖެ ޕްރޮމޯޓް ކުރުމަށް އެމްއެމްޕީއާރުސީ އާއި އެންއެޗްޖީއޭއެމްއާއި ދެމެދު އެއްބަސްވުމެއްގައި ސޮއިކޮށްފި

ދިވެހިރާއްޖެ ހަރުދަނާ ގޮތެއްގައި އިޝްތިހާރު ކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އާއި ނެޝަނަލް ހޮޓެލް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.

އެމްއެމްޕީއާރުސީގެ މައި އޮފީހުގައި މިއަދު މެންދުރު ފަހު ބޭއްވި ރަސްމިއްޔާތެއްގައި މި އެއްބަސްވުމުގައި އެމްއެމްޕީއާރުސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު އިބްރާހިމް ޝިއުރީ އާއި އެންއެޗްޖީއޭއެމްގެ ނައިބު ރައީސް އަހުމަދު ވަހީދެވެ.

އެމްއެމްޕީއާރްސީއިން ބުނީ މި އެއްބަސްވުމުގެ މަގުސަދަކީ ފަތުރުވެރިންގެ މެދުގައި އެންމެ ދާންބޭނުންވާ މަންޒިލެއްގެ ގޮތުގައި ރާއްޖެއަށް އޮތް ޝައުގުވެރިކަން އިތުރުކުރުން ކަމަށެވެ.

މި އެއްބަސްވުމުގައި ސޮއިކުރެއްވުމާ ގުޅިގެން އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވި ގޮތުގައި ކުރިއަރަމުން އަންނަ މާކެޓުތަކަށް ވަނުމަށް އެންއެޗްޖީއޭއެމާ އެކު ގުޅުން ބަދަހިކުރަން ލިބުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް ކަމަށެވެ.

"އެންއެޗްޖީއޭއެމް ފަދަ އިންޑަސްޓްރީ މުހިންމު ޕާޓްނަރުންނާ ގުޅިގެން އަޅުގަނޑުމެންގެ އަމާޒަކީ އަޅުގަނޑުމެންގެ ހަރަކާތްތައް އިތުރަށް ފުޅާކޮށް، އެކިއެކި މާކެޓުތަކުން ގިނަ ފަތުރުވެރިން ރާއްޖެއަށް ގެނައުން." ޝިއުރީ ވިދާޅުވިއެވެ.

މި ސްޓްރެޓީޖިކް އެމްއޯޔޫގެ ދަށުން، އެންއެޗްޖީއޭއެމް އިން މާކެޓިންގ މަސައްކަތްތަކާއި ބައިވެރިން ރެކްރޫޓްކުރުމުގައި މުހިންމު ދައުރެއް އަދާކުރާނެއެވެ. މީގެ އިތުރުން، އޭޝިއަން ޓޫރިޒަމް ފެއާ (އޭޓީއެފް) 2024 ފަދަ އެކިއެކި ހަރަކާތްތަކުގައި ރާއްޖެ ޕްރޮމޯޓްކުރުމަށާއި، ލޯކަލް އައިލަންޑް ފަތުރުވެރިކަން ކުރިއެރުވުމާއި، ދުނިޔޭގެ ފަތުރުވެރިކަމުގެ އެންމެ މަތީ މަންޒިލެއްގެ ގޮތުގައި ރާއްޖޭގެ ދަރަޖަ އިތުރަށް ހަރުދަނާ ކުރުމަށް ދެ ފަރާތުން ވެސް އެއްބާރުލުން ދޭނެއެވެ.

އޭޓީއެފް 2024އަކީ މުޅި އޭޝިއާގެ ސަރުކާރުތަކާއި ފަތުރުވެރިކަމުގެ ވިޔަފާރިތަކާއި ތަރައްގީގެ އިދާރާތަކުގެ މެދުގައި އެއްބާރުލުން ދިނުމަށް މުހިންމު ޕްލެޓްފޯމެކެވެ. އެއީ ނެޓްވޯކިންގ، ޕާޓްނަރޝިޕް ބިލްޑިންގ، އަދި ސަގާފީ ބަދަލުކުރުމުގެ އަގުހުރި ފުރުސަތުތަކެއް ލިބިގެންދާ ހަރަކާތެކެވެ. މިއަހަރުގެ އޭޓީއެފް ފެއާގައި ދުނިޔޭގެ ފަތުރުވެރިކަމުގެ ދުވަހާ ދިމާކޮށް އިތުރު ހަރަކާތްތަކެއް ބޭއްވުމަށް ވަނީ ހަމަޖެހިފައެވެ. ކޯ ޓޫރިޒަމް ޓްރޭޑް އެގްޒިބިޝަނާއި، ބީޓޫބީ ސެޝަންތަކާއި، ބީޓޫސީ ފުރުސަތުތަކުގެ އިތުރުން އޭޓީއެފް 2024 ގައި ވަރަށް ގިނަ ސައިޑް އިވެންޓްތައް ބޭއްވުމަށް ރޭވިފައިވެއެވެ.

އެމްއެމްޕީއާރުސީއިން އަބަދުވެސް މަސައްކަތްކުރަނީ ރާއްޖެ އަކީ ހުރިހާ މާކެޓްތަކުގައިވެސް އެންމެ އިސްކަންދޭ ފަތުރުވެރިކަމުގެ މަންޒިލެއްގެ ގޮތުގައި ޕްރޮމޯޓް ކުރަމަށެވެ. އެންއެޗްޖީއޭއެމް ފަދަ އިންޑަސްޓްރީގެ މުހިންމު ފަރާތްތަކާ އެކު ސްޓްރެޓެޖިކް ޕާޓްނާޝިޕްތައް ހަދައިގެން އެމްއެމްޕީއާރުސީގެ އަމާޒަކީ ކުރިއަރަމުން އަންނަ މާކެޓްތަކަށް އިތުރަށް ވަނުމެވެ. މި އެއްބަސްވުމުގެ ސަބަބުން ރާއްޖެ އަންނަ ފަތުރުވެރިންގެ އަދަދު ވަރަށް ބޮޑަށް އިތުރުވެ، ރާއްޖޭގެ ފަތުރުވެރިކަމުގެ ސިނާއަތް ކުރިއަރުވައި، ދުނިޔޭގެ މާކެޓުގައި ވޯލްޑްސް ލީޑިންގ ޑެސްޓިނޭޝަންގެ ރާއްޖޭގެ ދަރަޖަ އިތުރަށް ހަރުދަނާވެގެންދާނެކަމަށް ބެލެވެއެވެ.