ފުރަތަމަ މެޗުގައި ޖުނާގެ 22 ލަނޑާއެކު ޗެންޕިއަން ރެޑްހޯކްސް އިން ފެންވަރު ދައްކާލައިފި

7 ވަނަ ވެމްކޯ ހޭންޑްބޯޅަ މޯލްޑިވްސް ޗެންޕިއަންޝިޕް 2024 ގެ އަންހެން ޑިވިޝަން ގުރޫޕް ސީގައި މިރޭ އެންމެ ފަހުގެ ޗެންޕިއަން ރެޑްހޮކްސް އާއި އަސްދިޤާ އެސްސީ ވާދަކުރި މެޗު ފަސޭހަކަމައެކު 71-9 ގެ ތަފާތުބޮޑު ނަތީޖާއަކުން ކާމިޔާބުކޮށް ރެޑްހޮކްސް އިން އެޓީމުގެ ފެންވަރު ދައްކާލައިފި އެވެ.

މެޗުގެ ފުރަތަމަ ހާފު 31-5 ގެ ތަފާތުބޮޑު ނަތީޖާއަކުން ރެޑްހޮކްސް ކުރީގައި އޮވެގެން ނިމުނުއިރު، މެޗުގެ ދެވަނަ ހާފުގައި އެޓީމުން ވަނީ އިތުރު 40 ލަނޑު ކާމިޔާބުކޮށްފައެވެ. އަދި މިހާފުގައި އަސްދިޤާ އިން ވެސް އިތުރު ހަތަރު ލަނޑު ކާމިޔާބުކުރިއެވެ.

އަސްދިޤާ އެސްސީ އާއި ރެޑްހޮކްސް ވާދަކުރި މެޗުގެ ތެރެއިން... ފޮޓޯ: ގާފު ސްޕޯޓްސް / ހުސެއިން

އެގޮތުން މިމެޗުގައި ރެޑްހޮކްސްގެ ފާތިމަތު ޖުނާ 22 ލަނޑު ކާމިޔާބުކުރިއިރު، އެޓީމުގެ ފިރުޝާނާ ނަސީރު 17 ލަނޑު، އަދި ޔަސްފާ އާދަމް 15 ލަނޑު ކާމިޔާބުކޮށްފައިވެއެވެ. މީގެ އިތުރުން އެޓީމުގެ ފާތިމަތު ތުހުފާ ހަ ލަނޑު، އައިޝަތު އިބާ އަހުމަދު ފަސް ލަނޑު، ފާތުމަތު ޝާޔާ މުހައްމަދު ހަތަރު ލަނޑު އަދި ފާތުމަތު ޝާއިލާ ޝަފީޢު ވަނީ ދެލަނޑު ކާމިޔާބުކޮށްފައެވެއެވެ.

މީގެ އިތުރުން މިމެޗުގައި އަސްދިޤާ އެސްސީގެ އަފްރާ މޫސާ ތިން ލަނޑު ކާމިޔާބުކުރިއިރު، ހައްވާ ދިޔާނާ އަދި ޝަފްނާ މުހައްމަދު މިއިން ކޮންމެ ކުޅުންތެރިއެއް ދެލަނޑު ކާމިޔާބުކޮށްފައިވެއެވެ. މީގެ އިތުރުން އެޓީމުގެ ފާތުމަތު އިޔާޝާ އިސްމާއިލް ރާފިއު އަދި އައިޝަތު ތޫމާ ފަޒީލް މިއިން ކޮންމެ ކުޅުންތެރިއެއް ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ރެޑްހޮކްސްގެ ފާތިމަތު ޖުނާ އެވެ.

އަސްދިޤާ އެސްސީ އާއި ރެޑްހޮކްސް ވާދަކުރި މެޗުގެ ތެރެއިން... ފޮޓޯ: ގާފު ސްޕޯޓްސް / ހުސެއިން

މިއަހަރުގެ ހޭންޑްބޯލް މޯލްޑިވްސް ޗެންޕިއަންޝިޕްގެ އަންހެން ޑިވިޝަނުގައި 16 ޓީމު ބައިވެރިވެފައިވާއިރު، މުބާރާތް ކުރިއަށް ދަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ކުއާޓާ ފައިނަލަށް ހޮވޭއިރު، ކުއާޓާ ފައިނަލުގެ މެޗުތައް ކުޅުމަށް ހަމަޖެހިފައިވަނީ މިމަހުގެ 30 އަދި 31 ވަނަ ދުވަހުގެ ރޭ އެވެ. އަދި ސެމީ ފައިނަލް ދެމެޗު ޖޫން ދެވަނަ ދުވަހު ކުޅުމަށް ތާވަލުކުރެވިފައިވައިރު، ފައިނަލް މެޗު ކުޅުމަށް ތާވަލު ކުރެވިފައިވަނީ ޖޫން މަހުގެ ހަވަނަ ދުވަހުގެ ރޭ އެވެ.