މީހަކަށް ކުރެވޭ ކުށެއްޖެ ނާޖާއިޒު ފައިދާ ނަގާ ފަޟީހަތް ކުރުމަކީ ކޮށްގެންވާނެ ކަމެއް ނޫން - ރައީސް

މީހަކަށް ކުރެވޭ ކުށެއްޖެ ނާޖާއިޒު ފައިދާ ނަގާ ފަޟީހަތް ކުރުމަކީ ކޮށްގެންވާނެ ކަމެއް ނޫން ކަމުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ މުއިއްޒު މިހެން ވިދާޅުވެފައިމިވަނީ, ކުރީގެ ހޯމް މިނިސްޓަރ ޝެއިޚް އިމްރާން އަބްދުالله ގެ ކާރުކޮޅުގައި ޕިކަޕަކުން ޖެހި ހިނގި އެކްސިޑެންޓާއި ގުޅިގެން ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ޕީއެންސީގެ ޓިކެޓުގައި ވާދަކޮށް އިންތިޚާބުވެފައިވާ މެންބަރަކު އެމައްސަލައާ ގުޅިގެން ދެ ފަރާތާއި ވާހަކަދައްކައި ކޮށްފައިވާ ވީޑިއޯއަކާ ގުޅިގެންނެވެ.

އެވީޑިއޯއާ ގުޅިގެން ގިނަ ބައެއްގެ ފާޑުކިޔުން އިންތިޚާބީ މެންބަރު އިމްރާން ލަތީފް އަށް އަމާޒުވެފައިވާއިރު, އެވީޑިއޯގައި ޝެއިޚް އިމްރާން އެއްވެސް އެއްޗެެއް ވިދާޅުވެފައިނުވާތީ ގިނަ ބަޔަކު ވަނީ އެމަނިކުފާނަށްވެސް ނުރުހުން ފާޅުކޮށްފައެވެ.

އެމައްސަލައާ ގުޅިގެން ރައީސް މިއަދު އެކްސް ގައި ކުރެއްވި ޕޯސްޓެއްގައި ވިދާޅުވީ, މީހަކަށް ކުރެވޭ ކުށެއްގެ ނާޖާއިޒު ފައިދާ ނަގާ, އެއްވެސް މަގްސަދެއްގައި ވީޑިއޯކޮށް އާންމުންގެ ތެރޭގައި ފަޟީހަތްކޮށް ހެދުމަކީ, އަޚްލާގީ ގޮތުންނާއި އިޖުތިމާޢީ ގޮތުން ބަލާއިރު އެއްގޮތަަކަށްވެސް ކޮށްގެންވާނެ ކަންކަމެއް ނޫން ކަމަށެވެ.

ރައީސް ވަނީ އަޅުގަނޑުމެން އެންމެނަކީ އޯގާތެރި, ކުލުނުވެރި އަދި ޒިންމާދާރު މުޖުޔތަމަޢެެއް ބިނާކުރުމުގައި ޒިންމާދާރު ބަޔަކަށް ވުމަށް އެދިވަޑައިގެންފައެވެ.