ސިޔާސީ މަގާމްތަކުގެ އަދަދު ހާމަކުރާނަން - ސަރުކާރު

ސަރުކާރުގެ ސިޔާސީ މަގާމުތަކުގެ އަދަދު ވަރަށް އަވަހަށް ހާމަކުރައްވާނެ ކަމަށް ރައީސް އޮފީހުގެ ޗީފް ސްޕޯކްސް ޕާސަން ހީނާ ވަލީދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާ ވިދާޅުވީ, ސަރުކާރުގެ ސިޔާސީ މަގާމުތަކުގެ ވާހަކަ ވަރަށް ގިނަ ފަރާތްތަކުން އެކި ގޮތްގޮތައް ދައްކަމުން އަންނަ ކަމަށާއި, ސިޔާސީ މަގާމުތަކުގެ އަދަދު ވަރަށް އަވަހަށް ހާމަކުރައްވާނެ ކަމަށެވެ.

މި ސަރުކާރުގައި ސިޔާސީ މަގާމްތައް ގިނަ ކަމަށް ބުނެ އިދިކޮޅު ފަރާތްތަކުގެ ފާޑުކިޔުންތައް މި ސަރުކާރަށް ވަނީ އަމާޒުވެފައެވެ. އިދިކޮޅު ފަރާތްތަކުން ބުނަމުން އަންނަނީ މި ސަރުކާރުގެ ސިޔާސީ މަގާމްތައް ގިނަ ކަމަށާއި, ދައުލަތުގެ ބަޖެޓުން ބޮޑު ހަރަދެއް އެކަމަށް ހޭދަވާ ކަމަށެވެ.

ކޮންމެ ސަރުކާރެއްގައިވެސް ސިޔާސީ މަގާމްތައް ގިނަކަމަށް ބުނެ އާއްމުންގެ ފާޑުކިޔުން އަމާޒުވެއެވެ.