ނޮޅިވަރަމް ދާއިރާގެ އިންތިހާބީ މެމްބަރުވެސް ވެރިކަން ކުރާ ޕީއެންސީއަށް!

ނިމިޔިޔަ މަޖިލިސް އިންތިހާބުގައި އަމިއްލަ ގޮތުން ވާދަކުރައްވާ އިންތިހާބު ކާމިޔާބުކުރި އިތުރު މެމްބަރަކު ވެރިކަން ކުރާ ޕީއެންސީއާއި ގުޅިވަޑައިގެންފި އެވެ.

ޕީއެންސީއިން މިރޭ ބުނީ ރައްޔިތުންގެ މަޖިލީހުގެ އިންތިޚާބުގައި އަމިއްލަ ގޮތުން ވާދަކުރެއްވި ނޮޅިވަރަމް ދާއިރާގެ ކެންޑިޑޭޓު މުޙައްމަދު ރަޝީދު ޕީއެންސީއަށް ސޮއިކޮށްފައިވާ ކަމަށެވެ.

އިންތިހާބީ މެމްބަރު މުޙައްމަދު ރަޝީދު މަޖިލިސް އިންތިހާބު ކާމިޔާބުކުރެއްވީ ޕީއެންސީގެ ޓިކެޓުގައި އިންތިހާބުގައި ވާދަކުރެއްވި އަހުމަދު އަޝްރަފްގެ މައްޗަށް ކުޑަ ފަރަގަކުން ކުރި ހޯދައިގެންނެވެ. އެގޮތުން އިންތިހާބު ކާމިޔާބު ކުރެއްވި މުހައްމަދު ރަޝީދުއަށް ލިބިވަޑައިގެންނެވީ 661 ވޯޓެވެ. އަދި ޕީއެންސީގެ ޓިކެޓުގައި ވާދަކުރެއްވި އަހްމަދު އަޝަރަފްއަށް ލިބުނީ 613 ވޯޓެވެ.

އިންތިހާބީ މެމްބަރު މުހައްމަދު ރަޝީދު ޕީއެންސީއާއި ގުޅިވަޑައިގަތުމުން 20 ވަނަ މަޖިލީހުގައި ޕީއެންސީ ތަމްސީލުކުރާ މެމްބަރުންގެ އަދަދު ވަނީ 73 އަށް އަރާފައި އެވެ.

މިނިވަން މެމްބަރުންގެ ގޮތުގައި އިންތިހާބު ކާމިޔާބުކުރެއްވި އިތުރު 6 މެމްބަރަކު މިއަދު ވަނީ ޕީއެންސީއާއި ގުޅިވަޑައިގެންފައި އެވެ. އެއީ ހުރާ ދާއިރާއަށް އިންތިހާބުވި ޑރ. އަނާރާ ނައީމް، މަތިވެރި ދާއިރާއަށް އިންތިހާބުވި ޙަސަން ޒަރީރު، މައްޗަންގޮޅި މެދު ދާއިރާއަށް އިންތިހާބުވި އަހްމަދު ޒަމީރު، ތިމަރަފުށި ދާއިރާއަށް އިންތިހާބުވި އަހްމަދު ރިޔާޒް، ނައިފަރު ދާއިރާއަށް އިންތިހާބުވި ޔާސީން އަބްދުﷲ އަދި ވިލިނގިލި ދާއިރާއަށް އިންތިހާބުވި އާޒިމް އަބްދުލް އަޒީޒު އެވެ.