އަސްކަރީ ޑްރޯންގެ އެހީގައި ގެއްލުނު ދޯނި ހޯދައިފި

ގެއްލިގެން ހޯދަމުން ދިޔަ މ. މަޑުއްވަރީ "ފަރިހި 2" ދޯނި، އެމްއެންޑީއެފްގެ ޔޫއޭވީ ޑްރޯނާއި، ކޯސްޓްގާޑުގެ އުޅަނދުފަހަރު ބޭނުންކޮށްގެން ހޯދައިފި އެވެ.

މި ދޯނި ގެއްލިގެން އެމްއެންޑީއެފް އަށް ރިޕޯޓްކޮށްފައިވަނީ ރޭ 22:06 ހާއިރުއެވެ. މި ދޯންޏަކީ 3 މީހުންނާއެކު މަހަށް ނިކުތް ދޯންޏެއްކަމަށް އެމްއެންޑީއެފުން ވަނީ ބުނެފައެވެ.

އެމްއެންޑީއެފުން ވިދާޅުވީ، މި ދޯނި ފެނިފައިވަނީ މ. ރަތްމަންދޫގެ 23 ނޯޓިކަލް މޭލު ބޭރުންކަމަށެވެ. އަދި، ދޯނި ފެނުނުއިރު ދޯނީގެ އިންޖީނު ހުއްޓިފަައިވާކަމަށް އެމްއެންޑީއެފުން މަޢުލޫމާތުދެއެވެ.

މި އޮޕަރޭޝަންގައި އެމްއެންޑީއެފް އެއަރކޯ ގެ ޑްރޯންތައް ވަނީ ބޭނުންކޮށްފައެވެ. އެމްއެންޑީއެފުން ވަނީ ޑްރޯން މެދުވެރިކޮށް މި ދޯނި ހޯދަން ކުރި މަސައްކަތް ފެންނަ ފޮޓޯތައް އާއްމުކޮށްފައެވެ. މިއީ މި ޑްރޯންތައް ބޭނުންކޮށްގެން ރާއްޖޭގައި ހިންގާ ފުރަތަމަ ރަސްމީ އޮޕަރޭޝަން ކަމަށް މައުލޫމާތު ލިބެއެވެ.