ތިން ރަށެއްގައި ހޮސްޕިޓަލް އެޅުމަށް އެމްޓީސީސީއާ ހަވާލުކޮށްފި

ތިން ރަށެއްގައި އައު ހޮސްޕިޓަލްތައް އަޅަން ހެލްތް މިނިސްޓްރީން އެމްޓީސީސީއާ ހަވާލުކޮށް، އެއްބަސްވުމުގައި މިއަދު ސޮއިކޮށްފިއެވެ.

ސިއްހަތާ ބެހޭ ވުޒާރާއިން ބުނީ, މ. މުލި، ރ އަލިފުށީގެ އިތުރުން ނ. މަނަދޫގައި ހޮސްޕިޓަލް އެޅުމަށް އެމްޓީސީސީއާ ހަވާލުކޮށްފައިވާ ކަމަށެވެ.

އެމްޓީސީސީއާ ހަވާލުކޮށްފައިވަނީ ނ މަނަދޫ އަދި މުލީގައި 50 އެނދުގެ ހޮސްޕިޓަލް އެޅުމަށް ކަމަށެވެ. އެ މަސައްކަތް ހަވާލުކޮށްފައިވަނީ 720 ދުވަސްތެރޭ މަސައްކަތް ނިންމާ ގޮތަށެވެ.

ރ އަލިފުށީގައި އަޅަން ހަމަޖެހިފައިވަނީ 30 އެނދުގެ ހޮސްޕިޓަލެކެވެ. އެ މަސައްކަތް އެމްޓީސީސީއާ ހަވާލުކޮށްފައިވަނީ 730 ދުވަހުގެ ތެރޭގައި މަސައްކަތް ނިންމާ ގޮތަށެވެ.

މި މަޝްރޫޢާ ގުޅޭ އިތުރު ތަފްސީލެއް އެ ވުޒާރާއިން ހާމަކޮށްފައެއް ނުވެއެވެ.