ތޮއްޑޫ މަގު ހެދުމުގެ މަޝްރޫޢުގެ އަމަލީ މަސައްކަތް ފަށައިފި

އއ. ތޮއްޑޫ މަގު ހެދުމުގެ މަޝްރޫޢުގެ އަމަލީ މަސައްކަތް މިއަދު ރަސްމީކޮށް ފަށައިފި އެވެ.

މިއަދު ހަވީރު ތޮއްޑޫގައި ބޭއްވުނު ރަސްމިއްޔާތެއްގައި މި މަޝްރޫޢުގެ އަމަލީ މަސައްކަތް ރަސްމީކޮށް ފައްޓަވައިދެއްވީ ދިވެހި ބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހީމް އެވެ. މި ރަސްމިއްޔާތުގައި މި ކުންފުނީގެ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރޓ) އަލީ ޒުހައިރު އާއި ކުންފުނީގެ އިސް ބޭފުޅުންގެ އިތުރުން ކައުންސިލް މެންބަރުން ބައިވެރިވެވަޑައިގެންނެވި އެވެ.

ތޮއްޑޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގައި ސޮއި ކުރެވުނީ 2023 ވަނަ އަހަރުގެ ސެޕްޓެމްބަރު މަހުގެ 5 ވަނަ ދުވަހުއެވެ. މި މަޝްރޫޢު ސަރުކާރުން އާރްޑީސީއާއި ހަވާލުކުރީ 77,426,106.17 ދިވެހި ރުފިޔާ އަށެވެ.

އާރްޑީސީއިން ބުނީ މި މަޝްރޫޢުގެ ދަށުން ޖުމްލަ 2.84 ކިލޯމީޓަރު ހިމެނޭހެން 5 މަގެއްގެ މަސައްކަތް ކުރެވޭނެ ކަމަށާއި އއ. ތޮއްޑޫގެ މަގުތައް ތަރައްޤީ ކުރެވިގެންދާނީ ސްޓޯރމް ވޯޓަރ ނެޓްވޯކާއި ފެން ހިއްކުމަށް ގަޓަރުތައް ހެދުމާއި ފެނާއި ނަރުދަމާ ހިމެނޭހެން ޔުޓިލިޓީ ލައިންތަކަށް ބޭނުންވާ ޖަންކްޝަންތައް ބެހެއްޓުމާއި މަގު ބައްތި ޖެހުމާއި ސްޕީޑް ބްރޭކަރާއި ރޯޑް ސައިން ބޯޑު ހަރުކުރުން ފަދަ މަސައްކަތް ކުރެވިގެން ކަމަށެވެ.

އާރްޑީސީއިން މައުލޫމާތު ދޭގޮތުގައި ތޮއްޑޫ މަގުތައް ތަރައްޤީ ކުރަން ނިންމާފައިވަނީ ތާރުގެ ބަދަލުގައި ގައު އަތުރައިގެންނެވެ.

މި މަސައްކަތުގެ އަލީ މަސައްކަތް ރަސްމީކޮށް ފެށި އިރު އާރްޑީސީއިން ވަނީ ސައިޓާއި އަދި މަގު ހެދުމުގެ މަޝްރޫޢަށް ބޭނުންވާ ސާމާނު އިތުރުން ވެހިކަލްތައް މިހާރު އެރަށަށް ގެންގޮސްފައި އެވެ.