ތިނަދޫ އެކްސިޑެންޓުގައި އަނިޔާވި މީހާ އިތުރު ފަރުވާއަށް މާލެއަށް!
މުޙައްމަދު މުއައްވަޒު
4/13/2024, 1:22:10 PM
--
ތިނަދޫ ސިޓީގައި ރޭ ހިނގައިދިޔަ އެކްސިޑެންޓުގައި އަނިޔާވި މީހާ އިތުރު ފަރުވާއަށް މާލެ ގެންގޮސްފި އެވެ.
ތިނަދޫ ސިޓީގައި ރޭ 11 ޖަހާކަންހާއިރު ކާރަކާއި ސައިކަލެއް ޖެހި ހިނގައިދިޔަ އެކްސިޑެންޓުގައި ސައިކަލް ދުއްވަން އިން މީހާއަށް ބޮޑެތި އަނިޔާތަކެއް ވަނީ ލިބިފައެވެ. މައުލޫމާތު ލިބިފައިވާ ގޮތުގައި އޭނާގެ ފައި ވަނީ 3 ތަނަކުން ބިންދައިގެން ގޮސްފައެވެ.
މި އެކްސިޑެންޓުގައި އަނިޔާވެފައިވަނީ 64 އަހަރުގެ ދިވެހި ފިރިހެނަކަށެވެ. މައުލޫމާތު ލިބިފައިވާގޮތުގައި މި އެކްސިޑެންޓް ހިނގަން މެދުވެރިވީ ފަހަތުން އައި ކާރެއް އެ ސައިކަލުގައި ޖެހިގެންނެވެ.
މި އެކްސިޑެންޓުގައި އަނިޔާވި މީހާއަށް ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފަރުވާ ދިނުމަށްފަހު, އިތުރު ފަރުވާއަށް މިއަދު ހެނދުނު ވަނީ މާލެ ގެންގޮސްފައެވެ.