މަޖިލިސް އިންތިހާބާއި ގުޅޭގޮތުން މިހާތަނަށް 41 މައްސަލަ!

ކުރިޔަށް އޮތް ރައްޔިތުންގެ މަޖިލިސް އިންތިހާބާ ގުޅޭ 41 މައްސަލައެއް އިލެކްޝަންސް ކޮމިޝަނަށް ހުށަހަޅައިފި އެވެ.

މިކަން ހާމަކުރައްވައި އިލެކްޝަންސް ކޮމިޝަންގެ ތަރުޖަމާނު ހަސަން ޒަކަރިއްޔާ މިއަދު ވިދާޅުވީ އެކޮމިޝަނުގެ ކޮމްޕްލެއިންސް ބިއުރޯއަށް މަޖިލިސް އިންތިހާބާ ގުޅޭ 41 މައްސަލައެއް ހުށަހަޅާފައިވާ ކަމަށާއި އޭގެ ތެރެއިން 38 މައްސަލަ މިހާތަނަށް ބަލައި ނިމިފައިވާ ކަމަށެވެ. އަދި މިހާރު ތިން މައްސަލައެއް ބަލަމުން ދާކަމަށް ހަސަން ވިދާޅުވިއެވެ.

ހަސަން އިތުރަށް ވިދާޅުވީ ކޮމްޕްލެއިންސް ބިއުރޯއަށް ހުށަހެޅިފައިވަނީ 5 ބާވަތެއްގެ މައްސަލަ ކަމަށާއި އޭގެތެރެއިން ރަޖިސްޓްރޭޝަންއާ ގުޅޭ މާއްސަލަތަކާއި ކެންޑިޑެންސީއާ ގުޅޭ މައްސަލަތައް ބަލާ ނިމިފައިކަަމަށެވެ.

އަދި ވޯޓުލުމުގެ ހައްގާއި ގުޅޭގޮތުން ހުށަހަޅާފައިވާ 26 މައްސަލައިގެ ތެރެއިން 25 މައްސަލަ ނިންމައި، އެއް މައްސަލަ ބަލަމުންދާ ކަމަށާއި ކެމްޕޭން ކުުރުމާގުޅޭގޮތުން ހުށަހެޅިފައިވާ 5 މައްސަލައިގެ ތެރެއިން 4 މައްސަލަ ނިންމައި، އެއް މައްސަލަ ބަލަމުންދާކަމަށްވެސް ހަސަން ވިދާޅުވިއެވެ. އަދި މީގެ އިތުރުން އިންތިޚާބީ މުވައްޒަފުންނާއިބެހޭ 2 މައްސަލައިގެ ތެރެއިން 1 މައްސަލަ ބަލައި ނިންމާފައިވާކަމަށާއި 1 މައްސަލަ މިހާރުވެސް ބަލަމުންދާކަމަށް ހަސަން ފާހަގަކުރެއްވިއެވެ.

އިންތިޚާބާއި ގުޅޭ އެކިމައްސަލަތަކާއި ޝަކުވާތައް އީސީއަށް ލިބެމުންދާކަމަށާއި މިމައްސަލަތަކާއި ޝަކުވާތައް އީސީގެ ކޮމްޕްލެއިންސް ބިއުރޯއަށް ހުށަހެޅުމަށް އީސީން އެދިލައްވައެވެ.

މަޖިލިސް އިންތިހާބު ބޭއްވުމަށް ނިންމާފައިވަނީ މިމަހުގެ 21 ވަނަ ދުވަހު އެވެ. އެގޮތުން މި އިންތިހާބަށް އީސީއިން އަންނަނީ ވަރަށް ބޮޑަށް ތައްޔާރުވަމުންނެވެ.