ޕީއެންއެފް އުފެއްދުމުގެ ޖަލްސާގައި ބައިވެރިވުމަށް ޔާމީން ހުއްދައަށް އެދިއްޖެ

ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމުގެ ޖަލްސާގައި ބައިވެރިވެވަޑައިގެންނެވުމަށް ކުރީގެ ރައީސް އަބްދުﷲ ޔާމީން ހުއްދައަށްއެދިވަޑައިގަންނަވައިފި އެވެ.

ޕީއެންއެފް އަކީ ރައީސް ޔާމީން އިސްވެ އުފައްދަވަން މަސައްކަތް ކުރައްވަމުން އަންނަ ސިޔާސީ ޕާޓީއެކެވެ. ރައީސް ޔާމީން މިވަގުތު ޖަލު ހުކުމެއްގައި ހުންނެވުމުން އެމަނިކުފާނު ވަނީ މި ޖަލްސާގައި ބައިވެރިވެވަޑައިގެންނެވުމަށް ހުއްދައަކަށް އެދިވަޑައިގެންފައެވެ.

ޖަލު ހުކުމެއްގައި ހުންނެވި ނަމަވެސް އެމަނިކުފާނުގެ ބަންދަށް ލުއިދީ، މިހާރު ހުކުމް ތަންފީޒުކުރައްވަމުން ގެންދަވަނީ ގޭގައި ހުންނަވައިގެންނެވެ.

ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނީ އެމަނިކުފާނުގެ ވެރިކަމުގައި ވ. އާރަށް ކުއްޔަށް ދޫކުރުމާއި ރިޝްވަތާއި މަނީ ލޯންޑަރިންގެ ކުށް ސާބިތުވެގެންނެވެ.

ރައީސް ޔާމީން އަކީ ޖަލުހުކުމެއް ތަންފީޒުކުރަމުން އަންނަ ފަރާތަކަށް ވުމުން ސިޔާސީ ޕާޓީއެއް އުފެއްދުމުގައި ބައިވެރިވެވަޑައިނުގެންނެވެއެވެ. އެހެންކަމުން ޕީއެންއެފްގެ މުއައްސިސަކަށް ހަމަޖައްސާފައިވަނީ ރައީސް ޔާމީންގެ ދަރިކަލުން ޒެއިން ޔާމީން އެވެ.

ޕީއެންއެފް އުފެއްދުމުގައި އިސްކޮށް މަސައްކަތް ކުރައްވަމުން އަންނަ ކުރީގެ މިނިސްޓަރ މުހައްމަދު މަލީހު ޖަމާލު ވިދާޅުވީ، ޔާމީން މިނިވަން ކުރުމުގެ ވައުދުގެ މަތީގައި ދެމި ހުންނެވި ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ކަމަށެވެ. އެހެންވެ، ޔާމީންގެ ޕާޓީ، ޕީއެންއެފް އުފެއްދުމުގެ ޖަލްސާގައި ބައިވެރިވުމުގެ ހުއްދައަށް އެދި ގާނޫނީ ޓީމުގެ ފަރާތުން ސިޓީ ފޮނުވާފައި ވާނެ ކަމަށް ވިދާޅުވި އެވެ.