އެސްޓީއޯއިން ތާޒާ އިނގުރާއި ލޮނުމެދު އެތެރެކޮށް ހެޔޮ އަގެއްގައި ވިއްކަނީ
އަހުމަދު ޝުރާއު
3/31/2024, 6:26:55 PM
ލޮނުމެދު
ސްޓޭޑް ޓްރޭޑް އޯގަނައިޒޭޝަން, އެސްޓީއޯއިން އިނގުރާއި ލޮނުމެދުގެ ޝިޕްމެންޓެއް ރާއްޖެ އެތެރެކޮށް ހެޔޮ އަގެއްގައި ވިއްކަން ފަށައިފި އެވެ.
އެސްޓީއޯއިން މިއަދު ބުނީ އިނގުރާއި ލޮނުމެދުގެ އިތުރު ޝިޕްމެންޓެއް ރާއްޖެ ގެނެސް އެސްޓީއޯ ޕީޕަލްސް ޗޮއިސްއިން މިހާރު ވިއްކަން ފަށާފައިވާ ކަމަށެވެ.
އެގޮތުން އިނގުރު ބަސްތާއެއް 273 ރުފިޔާއަށް މިހާރު ލިބިލައްވާނެ ކަމަށް އެސްޓީއޯއިން ބުނެއެވެ. އަދި 5 ބަސްތާ ގަންނަ ނަމަ ބަސްތާއެއް 263 ގެ ރޭޓުން ލިބިލައްވާނެ ކަމަށްވެސް އެސްޓީއޯއިން ވަނީ ބުނެފައި އެވެ.
މީގެ އިތުރުން ތާޒާ ލޮނުމެދު ބަސްތާއެއް 302 ރުފިޔާއަށް މިހާރު އެސްޓިއޯއިން ވިއްކަން ފަށާފައިވާ ކަމަށާއި 5 ބަސްތާ ގަންނަ ނަމަ 292 ރުފިޔާއަށް ބަސްތާއެއް ލިބިލައްވާނެ ކަން އެކުންފުނިން ވަނީ ބުނެފައި އެވެ.
އެސްޓީއޯއިން ލޮނުމެދާއި އިނގުރު އެތެރެކޮށްފައިވަނީ ރާއްޖޭގެ ބާޒާރުގައި އިނގުރާއި ލުނުމެދުގެ އަގު ކުޑަކޮށް އުފުލެން ފެށުމާއި ތާޒާ ލޮނުމެދާއި އިނގުރު ބާޒާރުން ލިބެން ދަތިވެފައިވާ ދަނޑިވަޅެއްގައި އެވެ.
ރަމަޟާން މަހާއިއެކު އެސްޓީއޯއިން އަންނަނީ ރާއްޖޭގެ ބާޒާރުގައި އަގުބޮޑު ބާވަތްތައް އެތެރެކޮށް ހެޔޮ އަގެއްގައި ރައްޔިތުންނަށް ލިބޭނެ އިންތިޒާމުތައް ހަމަޖައްސަމުންނެވެ.