ޕީޕީއެމް/ޕީއެންސީ އޮތީ ރައީސް ޑރ މުޢިއްޒުއާއެކު ސާބިތުކަމާއެކު - ޣައްސާން

ޕީޕީއެމް/ޕީއެންސީ އޮތީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުއާއެކު ސާބިތުކަމާއެކު ކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ވަޒީރު ޣައްސާން މިމޭރުމުން ވިދާޅުވެފައި މިވަނީ, ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް އެއްވެސް ދިރުމެއް ދޭން މިހާރުގެ ރައީސް ޑރ މުޙައްމަދު މުޢިއްޒު ބޭނުންފުޅުނުވާކަން ހާމަވަމުންދާ ކަމަށް އެޕާޓީގެ ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވުމާއި ގުޅިގެންނެވެ.

އެފަދައިން ޔާމީން ވިދާޅުވުމާއި ގުޅިގެން, އެމަނިކުފާނަށް ރައްދުދެއްވައި ވަޒީރު ޣައްސާން އެކްސްގައި ކުރެއްވި ޕޯސްޓެއްގައި ވިދާޅުވީ, ރައީސުލްޖުމްހޫރިއްޔާ ޑރ މުހައްމަދު މުޢިއްޒު އިންތިޚާބަށް ނުކުމެވަޑައިގަތީ ޕީޕީއެމް ޕީއެންސީ ކޯލިޝަންއަށް އެންގެވި ފޯމިއުލާއެއްގެ ތެރެއިންކަމަށެވެ.

އަދި އެމަނިކުފާނު އިންތިޚާބަށް ނުކުމެވަޑައިގެންނެވީ, ޕީޕީއެމް ޕީއެންސީ ކޯލިޝަންގެ ލީޑަރުންނާއި ސެނެޓްއާއި އިންތީޚާބުކޮށްފައިވާ ދެ ޕާޓީގެ ހުރިހާ ގުނަވަންތަކާއި އާންމު މެމްބަރުންގެ ފުރިހަމަ އިތުބާރާއި ތާއީދާއެކު ކަމަށާއި, މިއަދުވެސް ހާލަތު އޮތީ ހަމަ އެހެންކަމަށެވެ.

ރައީސް ޔާމީން އިސްވެ ހުންވައި އުފައްދަވާ ޕީއެންއެފްއިން ކުރިޔަށް ގެންދިޔަ ޖަލްސާއެއްގައި ރައީސް ޔާމީން ވަނީ މިފަހަރުގެ މަޖިލީހަށް ޕީޕީއެމްގެ ނަމުގައި މެމްބަރުކަމަށް ވާދަކުރަން ރައީސް މުއިއްޒު ފުރުސަތު ނުދެއްވިކަމަށް ވިދާޅުވެފައި އެވެ. އަދި ރައީސް މުއިއްޒު ގެންދަވަނީ ޕީޕީއެމްއަށް ފަސްއަޅާ ވަޅުލަން މަސައްކަތްކުރައްވަމުން ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވަނީ ޕީޕީއެމްގެ ދެ ނައިބުން ކަމަށްވާ އަހުމަދު ޝިޔާމް އާ ޣައްސާން މައުމޫނު އެ ޕާޓީއާ މެދު އަޅާނުލާތީ ކަންބޮޑުވާކަމަށްވެސް ވިދާޅުވެފައި އެވެ.

ރައީސް މުއިއްޒު ވެރިކަމާއި ހަވާލުވެވަޑައިގެންނެވި ފަހުން ޕީޕީއެމްގެ ލީޑަރޝިޕާއި ޔާމީންއާއި ބޮޑެތި މައްސަލަތަކެއް ޖެހި ރައީސް ޔާމީން ވަނީ ޕީޕީއެމްއާއި ދުރަށް ވަޑައިގެންފައެވެ. އަދި މިހާރު ރައީސް ޔާމީން ގެންދަވަނީ ސަރުކާރަށް ވަރަށް ބޮޑަށް ފާޑުވެސް ވިދާޅުވަމުންނެވެ.