ހިލޭ ޑްރޯންދޭން ހުށަހެޅި ވާހަކަ ދޮގުކޮށްފި

އަވައްޓެރި ގައުމަކުން ރާއްޖެއަށް ހިލޭ ޑްރޯންދޭން ހުށަހެޅިކަމަށް ބުނެ އިދިކޮޅު ފަރާތްތަކުން ދައްކާވާހަކަތައް ޑިފެންސް މިނިސްޓަރު ޣައްސާން މައުމޫން ދޮގު ކުރައްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމަށް ލިބުނު ފުރުސަތުގައި ދާންދޫ ދާއިރާގެ އެމްޑީޕީ މެންބަރު ޔައުގޫބް އަބްދުالله ވަނީ ސަރުކާރުން ޑްރޯން ގަނެފައިވަނީ އަވައްޓެރި ގައުމަކުން ރާއްޖެއަށް ހިލޭ ޑްރޯން ހަދިޔާ ކުރަން ތައްޔާރަށް ތިއްބާ ކަމަށް މައުލޫމާތު ލިބޭ ކަމަށެވެ. އަދި އަގުބޮޑުކޮށް މިސަރުކާރުން ޑްރޯން ގަނެފައިވަނީ މަސްވެރިންނަށް ދޭން ޖެހޭ ފައިސާއިން ކަމަށް ޔައުގޫބް ވަނީ ތުހުމަތުކުރައްވާފައެވެ.

ޔައުގޫބްގެ މި ތުހުމަތުތަކަށް ޖަވާބުދެއްވަމުން ޣައްސާން ވިދާޅުވީ އެ ވާހަކައިގައި އެއްވެސް ހަގީގަތެއް ނެތް ކަމަށާޢި އެއްވެސް އަވައްޓެރި ގައުމަކުން ހިލޭ ޔޫއޭވީއެއް ދިވެހިރާއްޖެ އަށް ހަދިޔާކުރުމުގެ އެއްވެސް ކަމެއް ހިނގާފައި ނުވާ ކަމަށެވެ.

މިނިސްޓަރު ޣައްސާން ވިދާޅުވީ ޔޫއޭވީއެއް ހޯދުމަށް ދިވެހި ސިފައިން 7 އަހަރެއްހާ ދުވަހު މަސައްކަތް ކޮށްފައިވާ ކަމަށެވެ. އަދި އެ މަސައްކަތުގައި ކުލަ ޖެހިގެންދިޔައީ މި ސަރުކާރުން ކުރި މަސައްކަތުން ކަމަށެވެ.

އިދިކޮޅު އެމްޑިޕީން ތުހުމަތުކުރާ ގޮތުގައި ރާއްޖެއަށް ހިލޭ ޑްރޯން ހަދިޔާކުރުމަށް އަވައްޓެރި ގައުމަކުން އޮތީ ހުށަހަޅާފައެވެ.